Elimizdiń Qytaimen shekarada ornalasqan «Qorǵas – Shyǵys qaqpasy» arnaiy ekonomikalyq aimaǵynda ónerkásiptik óndiris pen kólik logistikasyn damytýǵa baǵyttalǵan investitsiialyq jobalar júzege asyrylýda. Búginde munda 65 joba iske asyrylyp, sonyń negizinde 4 myń jumys orny ashylady dep josparlanǵan, dep habarlaidy Dalanews.kz.
Arnaiy ekonomikalyq aimaqtyń bas direktorynyń mindetin atqarýshy Shyńǵys Maqashevtiń aitýynsha, 38 joba paidalanýǵa berilip, taǵy 27 joba kezeń-kezeńimen iske asyrylýda.
– Arnaiy ekonomikalyq aimaqtaǵy mańyzdy jobalarynyń biri – KTZE Khorgos Gateway Qurǵaq porty. Qazirgi ýaqytta qurǵaq portty keńeitý jumystary aiaqtaldy. Onda 2 jol jańartylyp, 8 qosymsha jol salyndy. Nátijesinde terminaldyń qýaty jylyna 540 myńnan 800 myń konteinerge deiin iaǵni, bir jarym esege artty. Sonymen qatar, AEA aýmaǵynda jalpy syiymdylyǵy 70 myń birlik avtokólik quraldaryna deiin jetetin, 19 ýaqytsha saqtaý qoimasyn qamtityn logistikalyq infraqurylym jumys isteidi, – deidi ol.
Aimaqta jyl sońyna deiin «Standart steel KZ» JShS metallýrgiialyq kesheni jańǵyrtýdyń 3-kezeńi iske asyrylady. Óndiris orny direktorynyń orynbasary Dáýren Saqtaǵanovtyń aitýynsha zaýyt armatýra óndirisine baǵyttalǵan.
– Armatýra kez-kelgen qurylysqa qajet bolǵandyqtan jyl basynan jumysty bastap kettik. Bizdiń basty maqsat – ózimizdiń shikizat, qara temirden armatýra shyǵarý. Búginde metallýrgiialyq keshende 80-ge jýyq jergilikti turǵyn jumys isteidi. Aldaǵy ýaqytta ónim sanyn arttyrý josparda bar, – deidi D. Saqtaǵanov.
Budan bólek, «Nomade Invest» JShS «Qorǵas-Shyǵys qaqpasy» temirjol infraqurylymyn qurý jónindegi jobany iske asyrýdy josparlap otyr. Sonymen qatar, jeńil avtomobilderdi bastapqy tirkeý jáne azamattarǵa keńes berý, Qytai Halyq Respýblikasynan ákelinetin kólik quraldaryn tirkeý boiynsha memlekettik qyzmet kórsetýdi uiymdastyrýǵa baǵyttalǵan mamandandyrylǵan sektor qurý, iaǵni arnaiy halyqqa qyzmet kórsetý ortalyǵyn ashý josparlanýda. Taǵy bir aita keterligi «Qorǵas-Shyǵys qaqpasy»AEA-da Germaniianyń «Skyhansa» kompaniiasymen birlesip, halyqaralyq áýejai salý qolǵa alynýda. Zamanaýi áýejai 50 myń tonna júk tasymaldap, saǵatyna 500 adamǵa deiin ótýge múmkindik beredi. Jalpy, «Qorǵas-Shyǵys qaqpasy» AEA aýmaǵynda iske asyrylatyn investitsiialyq jobalar ártúrli salalarda jańa kásiporyndar ashýǵa jáne jergilikti turǵyndar úshin jumys oryndaryn qurýǵa yqpal etedi.
– Prezident el ekonomikasyn damytý maqsatynda investitsiia tartý jumystaryn kúsheitýdi tapsyrǵan bolatyn. Osy baǵytta «Qorǵas – Shyǵys qaqpasy» AEA áleýetti investorlardy tartýǵa jaǵdai jasap, qarqyndy jumys isteýde, – dep atap ótti Shyńǵys Maqashev.
