ەلىمىزدىڭ قىتايمەن شەكارادا ورنالاسقان «قورعاس – شىعىس قاقپاسى» ارنايى ەكونوميكالىق ايماعىندا ونەركاسىپتىك ءوندىرىس پەن كولىك لوگيستيكاسىن دامىتۋعا باعىتتالعان ينۆەستيسيالىق جوبالار جۇزەگە اسىرىلۋدا. بۇگىندە مۇندا 65 جوبا ىسكە اسىرىلىپ، سونىڭ نەگىزىندە 4 مىڭ جۇمىس ورنى اشىلادى دەپ جوسپارلانعان، دەپ حابارلايدى Dalanews.kz.
ارنايى ەكونوميكالىق ايماقتىڭ باس ديرەكتورىنىڭ مىندەتىن اتقارۋشى شىڭعىس ماقاشيەۆتىڭ ايتۋىنشا، 38 جوبا پايدالانۋعا بەرىلىپ، تاعى 27 جوبا كەزەڭ-كەزەڭىمەن ىسكە اسىرىلۋدا.
– ارنايى ەكونوميكالىق ايماقتاعى ماڭىزدى جوبالارىنىڭ ءبىرى – KTZE Khorgos Gateway قۇرعاق پورتى. قازىرگى ۋاقىتتا قۇرعاق پورتتى كەڭەيتۋ جۇمىستارى اياقتالدى. وندا 2 جول جاڭارتىلىپ، 8 قوسىمشا جول سالىندى. ناتيجەسىندە تەرمينالدىڭ قۋاتى جىلىنا 540 مىڭنان 800 مىڭ كونتەينەرگە دەيىن ياعني، ءبىر جارىم ەسەگە ارتتى. سونىمەن قاتار، اەا اۋماعىندا جالپى سىيىمدىلىعى 70 مىڭ بىرلىك اۆتوكولىك قۇرالدارىنا دەيىن جەتەتىن، 19 ۋاقىتشا ساقتاۋ قويماسىن قامتيتىن لوگيستيكالىق ينفراقۇرىلىم جۇمىس ىستەيدى، – دەيدى ول.
ايماقتا جىل سوڭىنا دەيىن «Standart steel KZ» ج ش س مەتاللۋرگيالىق كەشەنى جاڭعىرتۋدىڭ 3-كەزەڭى ىسكە اسىرىلادى. ءوندىرىس ورنى ديرەكتورىنىڭ ورىنباسارى داۋرەن ساقتاعانوۆتىڭ ايتۋىنشا زاۋىت ارماتۋرا وندىرىسىنە باعىتتالعان.
– ارماتۋرا كەز-كەلگەن قۇرىلىسقا قاجەت بولعاندىقتان جىل باسىنان جۇمىستى باستاپ كەتتىك. ءبىزدىڭ باستى ماقسات – ءوزىمىزدىڭ شيكىزات، قارا تەمىردەن ارماتۋرا شىعارۋ. بۇگىندە مەتاللۋرگيالىق كەشەندە 80-گە جۋىق جەرگىلىكتى تۇرعىن جۇمىس ىستەيدى. الداعى ۋاقىتتا ءونىم سانىن ارتتىرۋ جوسپاردا بار، – دەيدى د. ساقتاعانوۆ.
بۇدان بولەك، «Nomade Invest» ج ش س «قورعاس-شىعىس قاقپاسى» تەمىرجول ينفراقۇرىلىمىن قۇرۋ جونىندەگى جوبانى ىسكە اسىرۋدى جوسپارلاپ وتىر. سونىمەن قاتار، جەڭىل اۆتوموبيلدەردى باستاپقى تىركەۋ جانە ازاماتتارعا كەڭەس بەرۋ، جۇڭگو حالىق رەسپۋبليكاسىنان اكەلىنەتىن كولىك قۇرالدارىن تىركەۋ بويىنشا مەملەكەتتىك قىزمەت كورسەتۋدى ۇيىمداستىرۋعا باعىتتالعان مامانداندىرىلعان سەكتور قۇرۋ، ياعني ارنايى حالىققا قىزمەت كورسەتۋ ورتالىعىن اشۋ جوسپارلانۋدا. تاعى ءبىر ايتا كەتەرلىگى «قورعاس-شىعىس قاقپاسى»اەا-دا گەرمانيانىڭ «Skyhansa» كومپانياسىمەن بىرلەسىپ، حالىقارالىق اۋەجاي سالۋ قولعا الىنۋدا. زاماناۋي اۋەجاي 50 مىڭ توننا جۇك تاسىمالداپ، ساعاتىنا 500 ادامعا دەيىن وتۋگە مۇمكىندىك بەرەدى. جالپى، «قورعاس-شىعىس قاقپاسى» اەا اۋماعىندا ىسكە اسىرىلاتىن ينۆەستيسيالىق جوبالار ءارتۇرلى سالالاردا جاڭا كاسىپورىندار اشۋعا جانە جەرگىلىكتى تۇرعىندار ءۇشىن جۇمىس ورىندارىن قۇرۋعا ىقپال ەتەدى.
– پرەزيدەنت ەل ەكونوميكاسىن دامىتۋ ماقساتىندا ينۆەستيسيا تارتۋ جۇمىستارىن كۇشەيتۋدى تاپسىرعان بولاتىن. وسى باعىتتا «قورعاس – شىعىس قاقپاسى» اەا الەۋەتتى ينۆەستورلاردى تارتۋعا جاعداي جاساپ، قارقىندى جۇمىس ىستەۋدە، – دەپ اتاپ ءوتتى شىڭعىس ماقاشيەۆ.
