Mega Center Management KASE-niń resmı tiziminen jaı aksıalaryn erikti túrde alyp tastaıtynyn (delıstıng) jarıalady. Mundaı sheshimdi kompanıanyń jalǵyz aksıoneri 6 aqpanda qabyldapty, dep jazady Dalanews.kz.
"Erikti delıstıng, atap aıtqanda "Mega Center Management "AQ-tyń jaı aksıalaryn "Qazaqstan qor bırjasy" AQ resmı tiziminen alyp tastaý maquldansyn", delingen KASE saıtyndaǵy 11 aqpanda jarıalanǵan kompanıa qujatynda.
Al bul árekettiń sebepteri týraly eshteńe aıtylmaıdy.
2025 jyly 1 qańtarda Mega Center Management-tiń jalǵyz aksıoneri Sıngapýrda tirkelgen The Steppe Sunrise Trust senimgerlik qorynyń basqarýyndaǵy A.G. Overseas PTE. LTD jeke aksıonerlik kompanıasy bolyp tabylady.
Sońǵy qarjylyq esep derekterine sáıkes, 2024 jylǵy 1 qazandaǵy jaǵdaı boıynsha Mega Center Management-tiń jıyntyq aktıvteri 61,3 mlrd teńgeni, jıyntyq mindettemeler 36,7 mlrd teńgeni qurady, menshikti kapıtal 24,6 mlrd teńge mólsherinde qalyptasty. 2024 jylǵy qańtar-qyrkúıektegi taza tabysy 11,5 mlrd teńgege jetti. Bul rette 2023 jyly Mega Center Management 14,3 mlrd teńge tabys tapqan.
Mega Center Management Qazaqstandaǵy eń iri MEGA saýda-oıyn-saýyq ortalyqtarynyń (Mega Alma-Ata, Almatydaǵy MEGA Park, Astanadaǵy MEGA Silk Way) jelisin salýmen jáne damytýmen aınalysatyn Astana Group-tyń qurylys salasyndaǵy bólimshesi bolyp sanalady.
Qazaqstandaǵy baı bıznesmender qataryna jatatyn Nurlan Smaǵulovtyń dáýleti 980 mln dollarǵa baǵalanady.
Buǵan deıin BTA Bank Raqyshevqa tıesili kompanıanyń aksıoneri atanǵanyn jazǵanbyz.
