Shymkentte qaza tapqan Nurai Serikbaidyń otbasynyń advokaty qyzdyń politsiiada jaýap berip otyrǵan sáti túsirilgen videonyń taralýyna bailanysty resmi shaǵym joldady, dep habarlaidy Dalanews.kz «31 arnaǵa» silteme jasap.
Videony quqyq qorǵaý organdarynan jumystan bosatylǵan burynǵy qyzmetker taratqan. Kadrlarda marqum Nurai kúdiktige qatysty eshqandai shaǵymy joq ekenin aitady. Osyǵan bailanysty jábirlenýshi taraptyń advokaty Serjan Nurpeiisov burynǵy politsiia qyzmetkerine istegi qupiia dálelderdi jariia taratqany úshin shaǵym túsirdi.
"Bul jaǵdai biz úshin tosyn jańalyq bolǵan joq. Bizdiń oiymyzsha, bul video - tergeý barysynda usynylýy tiis dálelderdiń biri jáne resmi tergeý aiaqtalǵanǵa deiin jariia etilmeýi kerek. Munda tergeý qupiiasy buzylǵan. Mundai jaǵdaida zańda tiisti sharalar, tipti qylmystyq jaýapkershilik te qarastyrylǵan. Biz shaǵym túsirdik, endi tergeý organdary bul jaitqa quqyqtyq baǵa beredi", - dedi Nurpeiisov.
Aita keteiik, 11 qańtarda Shymkentte 21 jastaǵy qyz pyshaq jaraqattarynan kóz jumdy. Qaiǵyly oqiǵa beinebaqylaý kameralaryna túsip qalǵan.
Marqumnyń týystarynyń aitýynsha, Nurai Serikbai 11 ret pyshaq jaraqatyn alǵan.
Eske salaiyq, buǵan deiin politsiia qyzmetkerleri jedel izdestirý is-sharalary barysynda 21 jastaǵy turǵyndy óltirdi degen kúdikti er adamdy ustady.
Sonymen qatar, Prezident Ulttyq quryltaida shymkenttik Nuraidyń ólimine qatysty pikir bildirdi.
