Qazaqstandyq bloger ári videograf Dastan Muhamedrahym WIBA Awards 2026 halyqaralyq syilyǵyn jeńip alyp, álemdegi úzdik trevel bloger atandy, dep habarlaidy dalanews.kz.
Marapattaý rásimi Frantsiiada Kann kinofestivali aiasynda ótti. Dastan Muhamedrahym jeńisi týraly áleýmettik jelidegi paraqshasynda jazyp, marapat tabystalǵan sáttiń videosyn jariialady. Onyń esimi álemge tanymal infliýenserlermen qatar ataldy.
WIBA Awards syilyǵy blogerler men digital jobalar arasyndaǵy "Oskar" retinde de jii aitylady.
Dastan Muhamedrahym kópshilikke Qazaqstan men ózge elder týraly videolary arqyly tanyldy. Ol óz jumystarynda tabiǵat, qala men mádenietti dron jáne kamera kómegimen kino stilinde túsiredi.
Blogerdi aitýly jeńisimen oqyrmandary, áriptesteri, bilik ókilderi quttyqtady. Týrizm jáne sport ministri Erbol Myrzabosynov bul marapatty Dastannyń kópjyldyq eńbegi men Qazaqstandy shetelde tanytýǵa qosqan úlesiniń nátijesi dep baǵalady.
Ministrdiń sózinshe, blogerdiń videolary arqyly milliondaǵan adam elimizdiń tabiǵaty, mádenieti jáne týristik oryndary týraly biledi.
Qazir blogerdiń Instagram paraqshasyna shamamen 1,7 million adam jazylǵan. Ol jelide tanymal bolǵanǵa deiin qazaq tili men ádebieti pániniń muǵalimi bolyp jumys istegen. Ýniversitetti támamdaǵannan keiin Semeidegi litseide sabaq berip, keiin oqý ornynyń Instagram paraqshasyn júrgize bastaǵan.
Buǵan deiin 600 mln oqyrmany bar Instagram-nyń resmi paraqshasy Qazaqstan týraly video jariialady. Bul Dastan Muhamedrahymnyń videosy edi. Keiinirek túrkiialyq ataqty áýekompaniianyń Instagram paraqshasynda da qazaqstandyq saiahatshynyń videosy jariialandy.
Jýyrda Gollivýd juldyzy Tom Holland tanymal videograf, bloger Dastan Muhamedrahymǵa "Órmekshi adam" treileriniń bir bóligine qatysqany úshin alǵys aitty.
