Qazaq tili týraly qaljyńdaimyn dep, aqyrynda 738 myń teńge aiyppul arqalap tynǵan fýtboldan ulttyq quramanyń bas bapkeri Stanislav Cherchesov atalǵan jaitqa qatysty alǵash ret pikir bildirdi, dep habarlaidy Dalanews.kz.
Ol reseilik "Sport-ekspress" basylymyna bergen suqbatynda, ol arada qaljyńdaǵanyn, shynynda da bóten oiy bolmaǵanyn aitqan.
"Ár kez el aldyna shyǵyp, sóilegen kezimde ne týraly aityp jatqanymdy ózim jaqsy bilemin. Eger meniń qaljyńymdy durys túsinbegen bolsa, demek, meniki durys emes", - dedi Cherchesov.
Aita ketsek, Ulttar ligasy aiasynda Sloveniiamen ótken machtan keiingi baspasóz konferentsiiasynda marqum Amangeldi Seiithannyń uly Begasyl Seiithan Stanislav Cherchesovke qazaq tilinde suraq qoiyp bastaidy. Bas bapker jýrnalistiń ústine Frantsiianyń PSJ klýbynyń jeidesin kiip alǵanyn ázilge ainaldyrǵysy keldi me, áiteýir: "Sen qai tilde sóilep tursyń – frantsýzsha ma?" dep sózin bóldi. Sonan soń basyn izep, suraǵyn jalǵastyrýǵa bolatynyn ańǵartty.
Odan keiin kópshilik Stanislav Cherchesovtiń munysyn qazaq tilin kemsitýge balap, áleýmettik jelide osy suqbattyń videosyn jappai bólise bastady. Týrizm jáne sport ministrligi bul jaǵdaiǵa bei-jai qaramai, Qazaqstan fýtbol federatsiiasyna resmi hat joldady. Kóp uzamai Cherchesovke aiyppul salynǵany belgili boldy. Parlamentte bul jaily Qazaqstan fýtbol federatsiiasynyń prezidenti Ádilet Bármenqulov málim etti. Týrizm jáne sport ministri osy jaǵdailardan soń eldi sabyrǵa shaqyryp, jelide jazba jariialady.
