قازاق ءتىلى تۋرالى قالجىڭدايمىن دەپ، اقىرىندا 738 مىڭ تەڭگە ايىپپۇل ارقالاپ تىنعان فۋتبولدان ۇلتتىق قۇرامانىڭ باس باپكەرى ستانيسلاۆ چەرچەسوۆ اتالعان جايتقا قاتىستى العاش رەت پىكىر ءبىلدىردى، دەپ حابارلايدى Dalanews.kz.
ول رەسەيلىك "سپورت-ەكسپرەسس" باسىلىمىنا بەرگەن سۇقباتىندا، ول ارادا قالجىڭداعانىن، شىنىندا دا بوتەن ويى بولماعانىن ايتقان.
"ءار كەز ەل الدىنا شىعىپ، سويلەگەن كەزىمدە نە تۋرالى ايتىپ جاتقانىمدى ءوزىم جاقسى بىلەمىن. ەگەر مەنىڭ قالجىڭىمدى دۇرىس تۇسىنبەگەن بولسا، دەمەك، مەنىكى دۇرىس ەمەس"، - دەدى چەرچەسوۆ.
ايتا كەتسەك، ۇلتتار ليگاسى اياسىندا سلوۆەنيامەن وتكەن ماچتان كەيىنگى باسپا ءسوز كونفەرەنسياسىندا مارقۇم امانگەلدى سەيىتحاننىڭ ۇلى بەگاسىل سەيىتحان ستانيسلاۆ چەرچەسوۆكە قازاق تىلىندە سۇراق قويىپ باستايدى. باس باپكەر ءجۋرناليستىڭ ۇستىنە فرانسيانىڭ پسج كلۋبىنىڭ جەيدەسىن كيىپ العانىن ازىلگە اينالدىرعىسى كەلدى مە، ايتەۋىر: "سەن قاي تىلدە سويلەپ تۇرسىڭ – فرانسۋزشا ما؟" دەپ ءسوزىن ءبولدى. سونان سوڭ باسىن يزەپ، سۇراعىن جالعاستىرۋعا بولاتىنىن اڭعارتتى.
ودان كەيىن كوپشىلىك ستانيسلاۆ چەرچەسوۆتىڭ مۇنىسىن قازاق ءتىلىن كەمسىتۋگە بالاپ، الەۋمەتتىك جەلىدە وسى سۇقباتتىڭ ۆيدەوسىن جاپپاي بولىسە باستادى. تۋريزم جانە سپورت مينيسترلىگى بۇل جاعدايعا بەي-جاي قاراماي، قازاقستان فۋتبول فەدەراسياسىنا رەسمي حات جولدادى. كوپ ۇزاماي چەرچەسوۆكە ايىپپۇل سالىنعانى بەلگىلى بولدى. پارلامەنتتە بۇل جايلى قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ءمالىم ەتتى. تۋريزم جانە سپورت ءمينيسترى وسى جاعدايلاردان سوڭ ەلدى سابىرعا شاقىرىپ، جەلىدە جازبا جاريالادى.
