Polsha elshiliginiń ýaqytsha senimdi ókili Mihal Labenda ózin "qazaqshasóileshnikpin" dep atap, video jariialady, dep habarlaidy Dalanews.kz.
Bul onyń elimizde belgili zańger Erjan Esimhanovqa jaýaby retinde kórindi.
"Iá, men qazaqshasóileshnikpin - kóbinde qazaqsha sóilesip júrmin jáne menimen qazaqsha sóilesseń, riza bolamyn", – dedi Polsha elshisi paraqshasynda.
Aita keteiik
Mihal Labenda - Polshanyń tájiribeli diplomaty jáne shyǵystanýshysy, qazaq tili men mádenietine tereń qyzyǵýshylyq tanytqan tulǵa.
Labenda qazaq tiline degen qyzyǵýshylyǵyn 1993 jyly Almatyǵa kelgen kezde bastady. Ol ál-Farabi atyndaǵy Qazaq ulttyq ýniversitetiniń (QazUÝ) daiyndyq bóliminde qazaq tilin úirenip, keiin ýniversitettiń shyǵystaný fakýltetinde bilim aldy. 1999 jyly «Vostokovedenie» mamandyǵy boiynsha úzdik diplommen bitirip, diplomdyq jumysyn «Arab tilinen qazaq tiline kúrdeli baǵynyńqy sóilemderdi aýdarý úlgileri» taqyrybynda qorǵady.
Mihal Labenda qazaq tilin erkin meńgergen. Ol qazaq tilinde lektsiialar oqyp, resmi is-sharalarda sóileidi. Mysaly, 2024 jyly Qazaqstan Respýblikasy Prezidenti janyndaǵy Memlekettik basqarý akademiiasynda «Polshanyń Eýropalyq Odaqtaǵy 20 jyldyǵy» taqyrybynda qazaq tilinde dáris oqydy. Ol qazaq tiliniń bai sózdik qory men idiomalaryn joǵary baǵalap, tildi úirený arqyly halyqtyń bolmysyn tereń túsinýge bolatynyn atap ótti.
Eske salaiyq, áleýmettik jelide tanymal zańger Erjan Esimhanovtyń qazaq tilinde sóileitinderge qatysty jazbasy qyzý talqyǵa túsken bolatyn. Threads-tegi jazbadan keiin qalyń kópshilik ashyq pikir bildirip, narazylyǵyn kórsetti.
Jelidegi myna jazbadan keiin daý shyqty:
Zańger kóne tilderdegi mátinderdi qalpyna keltirip, erekshe kontent jasaityn Arum Natzorkhang esimdi bloger týraly aita kelip, sóz arasynda "bul qazaqshasóileshnikterge qaidan jetsin?" degendei mysqyldaǵan.
Halyqtyń ashyq reaktsiiasy
Jeli qoldanýshylary qazaq tili sóz bolǵan bul daýly jazbadan keiin únsiz qalmaǵan.
"Ana tilin qurmetteýge shaqyrǵandardy "Qazaqshasóileshniki" dep kemitetin qazaq bloger bar eken. Angliiada turmasa da aǵylshyn tilin sanaýly ýaqytta úirenipti. Biraq Qazaqstanda týyp-ósse de 30 jylda ana tilin meńgermegenine tań qalam", - dep jazdy jýrnalist Ǵalymjan Qaramanuly.
"Qazaqshasóileshniki" degen termindi bolyppyz. Bálkim qazaqsha sóileýdi talap etetinder "rýsskoiazychnaia sreda" ókilderine yńǵaisyzdyq týdyryp júrgen bolarmyz", - dep jazdy tanymal prodiýser Aisáýle Ábilda.
"Qazaqsha sóile degennen sonsha shoshyp, ony bir qubyjyq qylyp kórsetesiz", "Qansha aqtalsańyz da "qazaqshasóileshniki" dep kemsitkenińiz durys bolmapty", "Qazaqty kemsitpe, qazaq bala", - dedi ózge de jeli qoldanýshylary.
