Jol jóndeý jumystary júieli júrgizilýde
Jaýyndy-shashyndy kúnderi, kóktem men kúz mezgilinde júrginshiler lai-batpaqqa batyp, ábden áýre-sarsańǵa salynsa, jaz ailarynda sapasy syn kótermeitin joldan shyǵatyn shańnan quddy bir tumannyń arasynda júrgendei kúi keshýshi edi. Bundaida kólik tizginin ustaǵan júrgizýshilerdiń shegetin azabymen qosa, temir tulparlarynyń da surqy qashatyn. Júrgizýshiler dittegen jerine zorǵa jetkenimen, temir tulparynyń qosalqy bólshekteri syr berip, jóndeýden ótkizýge týra keletinin jii estip keldik. Bul qaltaǵa salmaq salyp, júikege shi júgirtkendei áser eteri de jasyryn emes. Al, eldi mekenderdi bir-birimen bailanystyryp, qyj-qyj qainaǵan tynymsyz tirshilikke óshpes nár berip jatqan kúre joldardyń qadir-qasietin onyń beinetin tartyp júrgen turǵyndardan artyq eshkim bile qoimas. Onyń ústine joldyń sapasy adam tózgisiz bolsa, shoqyraq attyń ústinde kele jatqandai jaisyz kúi kesherińiz aitpasa da belgili. Kedir-budyry mol sapasyz joldar kóńilge qaiaý ákeletin. Ásirese, aýdannyń ishindegi oidym joldyń saldarynan jolaýshylardyń zardap shegetini eshkimge qupiia emes. Osyǵan deiin shýlyqtardyń janaiqaiyna ainalǵan, jóndeý kórmegenine 10 jylǵa jýyqtaǵan osynaý jol máselesi qanshama maqalaǵa arqaý bolyp, dál osy joldyń ainalasynda aitylar áńgime de az bolmady. Osyǵan qarap-aq, jol shyn máninde ómirdiń ózegi, baqýatty tirliktiń qainar kózi ekenin ańǵarýǵa bolady. Órkenietti elderdiń barys-kelis pen alys-beriste jol qatynasyna airyqsha nazar aýdaratyny da sondyqtan.
Al, búginde kópshiliktiń qabyrǵasyna aiazdai batqan Shýdaǵy osy bir túitkildiń túiini birtindep sheshile bastaǵan syńaily. Joldardy qalpyna keltirý jáne ony kúrdeli jóndeýden ótkizý asa ózekti másele. Shuǵyl túrde jóndeýdi talap etip kelgen aýdan joldarynyń jaǵdaiy búgingi kúni edáýir jaqsaryp qalǵan. Qazir Shýdaǵy taqtaidai tep-tegis joldar barar jerińe tez jetkizip, eshqandai áýre-sarsańǵa salmaidy. Shý óńirinde kúrmeýi kelispegen osynaý ózekti máseleni sheshý úshin osydan eki jyl buryn qarqyndy jumystar bastalyp ketken bolatyn. Sonyń ishinde, biz mysalǵa keltirgen aýdannyń ishki joldaryn jóndeý jumystary kolǵa alyndy. Buǵan qosa, 2017 jyly aýdanǵa ákim bolyp sailanǵan Qairat Dosaev bul jumystardy óziniń erekshe baqylaýynda ustap otyr. Osylaisha, buǵan deiin kópshiliktiń oryndy renishin týyndatqan másele retke kele bastady. Qairat Áskerbekuly ákim bolǵaly aýdandyq mándegi Tóle bi aýylynyń kire beris avtomobil jolynyń 2,19 shaqyrymyna, Abai aýylyna kire beris joldyń 8,68 shaqyrymyna, Shý qalasyndaǵy temir jol beketiniń avtoturaq alańyna jáne qaladaǵy Satpaev, S.Shákirov, Naýaliev kóshelerine jóndeý jumystary júrgizildi. Osyndai igilikti is aýdanǵa qarasty aýyldarda da jalǵasyn tapty. Máselen, Birlik aýylyndaǵy Panfilov kóshesiniń 2,320 shaqyrymyna ortasha jóndeý jumystary júrgizilse, aýdan ortalyǵy Tóle bi aýylyndaǵy Tóle bi kóshesiniń 1,2 shaqyrymyna, Moiynqum aýylyndaǵy Shákirov kóshesiniń 0,8 shaqyrymyna, Dalaqainar aýylyndaǵy Tóle bi kóshesiniń 0,8 shaqyrymyna, Alǵa aýylyndaǵy Shymyrqul kóshesiniń 0,63 shaqyrymyna, Saýytbek aýylyndaǵy Qydyrbai kóshesiniń 0,5 shaqyrymyna ortasha jóndeý jumystary júrgizilip, aýyldardyń kórki ajarlana túsken.
