Qyz erkem, kestesimen kórkem
Eńbek jolyn fabrikada qarapaiym tiginshi bolyp bastaǵan ol jeke kásip iesi bolýdy kishkentaiynan arman etken. Búginde Shý qalasynda tigin sheberhanasyn ashyp, 10-nan asa adamdy jumyspen qamtyp otyrǵan jeke kásipkerdiń tasy órge domalap-aq tur.
- Bala kezimnen ulttyq naqyshtaǵy kiimderdi tigýge qumartyp óstim. Tiginshilik qasiet anamnan daryǵan. Ol kisige ákesinen buiyrypty. Naǵashy atam kózi tirisinde óz qyzdaryna toi kóilekterin tigip, qutty oryndaryna qondyrǵan eken. Bala kezimde alǵash kiim tige bastaǵanymdy kórgen anam: «Osy qyz tiginshi bolady-aý» dep maǵan súisine qaraidy eken.Óse kele, osy tigin salasynyń qyr-syryna qanyq bolý úshin 1989 jyly Taraz qalasyndaǵy «Sulý» fabrikasynda tiginshi bolyp jumys istep, tájiribe jinaqtai bastadym. Keiinnen,táýekelge bel býyp, azdy-kópti tigin mashinalaryn alyp, az ǵana adammen óz kásibimdi bastap kettim, - deidi kásipker.
Marjan Taraz qalasynyń týmasy. Mektepti de sol jaqta bitirip, kásiptik tehnikalyq kolledjde tiginshi mamandyǵy boiynsha bilim alǵan. Ómirlik jaryn Shý óńirinen jolyqtyryp, otaý qurǵannan keiin de tiginshilikti tastamaǵan. Aýdandaǵy atelelerde jumys isteitin tiginshilermen birge meiramhana, mektep jáne taǵy basqalarynyń perdelerin ásemdep, sándi etip tigýmen ainalysady. Tájiribesi tolysqan kezde óz kásibin qolǵa alýdy uiǵarǵan Marjan 2008 jyly «Baimanasova» jeke kásipkerligin ashady. Alǵashynda shaǵyn ǵana bólmelerdi jalǵa alyp, kiim tigý, qysqartý, óńdeý syndy jumystardan bastaǵan. Ýaqyt óte kele, oiý-órnekpen órilgen, kestemen kómkerilgen ulttyq úlgidegi kiimderi arnaiy tapsyryspen tigile bastapty. Kásibin jańadan bastaǵanda nemistiń «Zinger»tigin mashinasymen jumys istese, qazirgi tańda sheberhana kúrdeli jumystardy ońai atqara alatyn arnaiy tigin mashinalarymen jabdyqtalǵan. Qyz uzatý, quda túsý, besikke salý, tusaýkeser, úilený toiy rásimderi Marjannyń turaqty tabys kózine ainalǵan. Qazirgi kezde Shý aýdanyndaǵy ulttyq merekeler, saltanatty sharalar tiginshiniń qolynan shyqqan dúnielersiz ótpeidi. «2012 jyldan bastap kelisimshart arqyly Shý aýdany men Moiynqum aýdanynyń Mádeniet úiine tapsyryspen kiim tigemin. Ol kóbinde, orkestrlar, ánshiler jáne bishilerge arnalady. «Qyz syny», «Jigit sultany» syndy baiqaýlarǵa da tapsyrystar kóp túsedi», - deidi Marjan Esengeldiqyzy.
