ەڭبەك جولىن فابريكادا قاراپايىم تىگىنشى بولىپ باستاعان ول جەكە كاسىپ يەسى بولۋدى كىشكەنتايىنان ارمان ەتكەن. بۇگىندە شۋ قالاسىندا تىگىن شەبەرحاناسىن اشىپ، 10-نان اسا ادامدى جۇمىسپەن قامتىپ وتىرعان جەكە كاسىپكەردىڭ تاسى ورگە دومالاپ-اق تۇر.
- بالا كەزىمنەن ۇلتتىق ناقىشتاعى كيىمدەردى تىگۋگە قۇمارتىپ ءوستىم. تىگىنشىلىك قاسيەت انامنان دارىعان. ول كىسىگە اكەسىنەن بۇيىرىپتى. ناعاشى اتام كوزى تىرىسىندە ءوز قىزدارىنا توي كويلەكتەرىن تىگىپ، قۇتتى ورىندارىنا قوندىرعان ەكەن. بالا كەزىمدە العاش كيىم تىگە باستاعانىمدى كورگەن انام: «وسى قىز تىگىنشى بولادى-اۋ» دەپ ماعان سۇيسىنە قارايدى ەكەن.وسە كەلە، وسى تىگىن سالاسىنىڭ قىر-سىرىنا قانىق بولۋ ءۇشىن 1989 جىلى تاراز قالاسىنداعى «سۇلۋ» فابريكاسىندا تىگىنشى بولىپ جۇمىس ىستەپ، تاجىريبە جيناقتاي باستادىم. كەيىننەن،تاۋەكەلگە بەل بۋىپ، ازدى-كوپتى تىگىن ماشينالارىن الىپ، از عانا اداممەن ءوز كاسىبىمدى باستاپ كەتتىم، - دەيدى كاسىپكەر.
مارجان تاراز قالاسىنىڭ تۋماسى. مەكتەپتى دە سول جاقتا ءبىتىرىپ، كاسىپتىك تەحنيكالىق كوللەدجدە تىگىنشى ماماندىعى بويىنشا ءبىلىم العان. ومىرلىك جارىن شۋ وڭىرىنەن جولىقتىرىپ، وتاۋ قۇرعاننان كەيىن دە تىگىنشىلىكتى تاستاماعان. اۋدانداعى اتەلەلەردە جۇمىس ىستەيتىن تىگىنشىلەرمەن بىرگە مەيرامحانا، مەكتەپ جانە تاعى باسقالارىنىڭ پەردەلەرىن اسەمدەپ، ءساندى ەتىپ تىگۋمەن اينالىسادى. تاجىريبەسى تولىسقان كەزدە ءوز كاسىبىن قولعا الۋدى ۇيعارعان مارجان 2008 جىلى «بايماناسوۆا» جەكە كاسىپكەرلىگىن اشادى. العاشىندا شاعىن عانا بولمەلەردى جالعا الىپ، كيىم تىگۋ، قىسقارتۋ، وڭدەۋ سىندى جۇمىستاردان باستاعان. ۋاقىت وتە كەلە، ويۋ-ورنەكپەن ورىلگەن، كەستەمەن كومكەرىلگەن ۇلتتىق ۇلگىدەگى كيىمدەرى ارنايى تاپسىرىسپەن تىگىلە باستاپتى. كاسىبىن جاڭادان باستاعاندا نەمىستىڭ «Zinger»تىگىن ماشيناسىمەن جۇمىس ىستەسە، قازىرگى تاڭدا شەبەرحانا كۇردەلى جۇمىستاردى وڭاي اتقارا الاتىن ارنايى تىگىن ماشينالارىمەن جابدىقتالعان. قىز ۇزاتۋ، قۇدا ءتۇسۋ، بەسىككە سالۋ، تۇساۋكەسەر، ۇيلەنۋ تويى راسىمدەرى مارجاننىڭ تۇراقتى تابىس كوزىنە اينالعان. قازىرگى كەزدە شۋ اۋدانىنداعى ۇلتتىق مەرەكەلەر، سالتاناتتى شارالار تىگىنشىنىڭ قولىنان شىققان دۇنيەلەرسىز وتپەيدى. «2012 جىلدان باستاپ كەلىسىمشارت ارقىلى شۋ اۋدانى مەن مويىنقۇم اۋدانىنىڭ مادەنيەت ۇيىنە تاپسىرىسپەن كيىم تىگەمىن. ول كوبىندە، وركەسترلار، انشىلەر جانە بيشىلەرگە ارنالادى. «قىز سىنى»، «جىگىت سۇلتانى» سىندى بايقاۋلارعا دا تاپسىرىستار كوپ تۇسەدى»، - دەيدى مارجان ەسەنگەلدى قىزى.
