1 qańtardan bastap Qazaqstanda salyqtyq ákimshilendirýdi jeńildetýge, bizneske túsetin júktemeni azaitýǵa jáne ekonomikalyq belsendilikti yntalandyrýǵa baǵyttalǵan jańa Salyq kodeksi kúshine endi. Bul týraly Ulttyq ekonomika ministrliginiń baspasóz qyzmeti málimdedi, dep habarlaidy Dalanews.kz.
Vedomstvonyń málimetinshe, jańa kodeks salyq júiesin edáýir jeńildetýdi kózdeidi. Salyqtyq eseptik kólemi 30%-ǵa, salyqtar sany 20%-ǵa qysqardy. Sondai-aq salyqtyq ákimshilendirý sharalary kezeń-kezeńmen jáne eskertý sipatynda qoldanylady.
Kameraldyq baqylaý aldyn alý quralyna ainalady. Salyqtyq bereshekti óndirý, sondai-aq keiinge qaldyrý men bólip tóleý rásimderi jeńildetildi. Bereshek somasy az bolǵan jaǵdaida biznes-shottardy buǵattaý qoldanylmaidy.
Ekonomikanyń jekelegen salalaryna arnalǵan jeńildikter
Ishki jáne syrtqy týrizmi salasyn qoldaý maqsatynda týroperatorlardyń qyzmeti boiynsha ainalymdar qosylǵan qun salyǵynan (QQS) bosatyldy. Bul týristik qyzmetterdiń qunyn tómendetip, salanyń investitsiialyq tartymdylyǵyn arttyrýǵa jáne sheteldik týrister aǵynyn ulǵaitýǵa múmkindik berýi múmkin.
2026 jyldan bastap otandyq baspa kitaptaryn satý jáne olardy basyp shyǵarý qyzmetteri de QQS-tan bosatyldy. Bul kitap óniminiń ózindik qunyn tómendetip, otandyq ádebietterdiń assortimentin keńeitýge ári qazaqstandyq avtorlar men baspalardy qoldaýǵa baǵyttalǵan.
QQS-tan sondai-aq tegin meditsinalyq kómektiń kepildendirilgen kólemi, mindetti áleýmettik meditsinalyq saqtandyrý aiasyndaǵy taýarlar men qyzmetter, orfandyq jáne áleýmettik mańyzy bar aýrýlardy emdeý shyǵyndary bosatyldy.
Agroónerkásip, óndiris jáne investitsiiaǵa arnalǵan sharalar
Aýyl sharýashylyǵy taýar óndirýshileri úshin QQS-tyń esepke jatqyzylatyn úlesi 70%-dan 80%-ǵa deiin ulǵaityldy. Qazaqstan aýmaǵynda qaita óńdeýge arnalǵan importtyq shikizat pen materialdar boiynsha QQS tóleý merzimi 1 jylǵa deiin keiinge qaldyrylady.
Investitsiia tartý jáne óndiristi jańǵyrtý úshin:
- qurylys,
- jabdyqtar men baǵdarlamalyq qamtamasyz etýdi satyp alý,
- rekonstrýktsiia jáne jańǵyrtý shyǵyndary boiynsha
100% shegerim kózdelgen. Ǵylymi-zertteý ázirlemelerin qarjylandyrýǵa 300% mólsherinde «sýpershegerimder» engizildi.
Baǵaly qaǵazdar naryǵyn qoldaý maqsatynda birjalyq tizimdegi baǵaly qaǵazdar boiynsha dividendterge salynatyn salyqtan bosatý jeńildigi saqtaldy. Arnaiy ekonomikalyq aimaqtar men investitsiialyq kelisimder sheńberindegi salyqtyq preferentsiialar da ózgerissiz qaldy.
Geologiialyq barlaý jáne taý-ken salasy
Tozǵan ken oryndaryn igerý jáne geologiialyq barlaýdy yntalandyrý úshin jańa jobalarǵa 5 jyl merzimge paidaly qazbalardy óndirýge salynatyn salyqtyń (PQÓS) nóldik mólsherlemesi engizildi. Sonymen qatar paidaly qazbalardy qaita óńdeý boiynsha salyqtyq jeńildikter qarastyrylǵan.
Arnaiy salyq rejimderi
Arnaiy rejimder sany 7-den 3-ke deiin qysqartyldy:
- ózin-ózi jumyspen qamtyǵandar úshin,
- ońailatylǵan deklaratsiia negizinde,
- sharýa jáne fermer qojalyqtary úshin.
Ózin-ózi jumyspen qamtyǵandarǵa JShS nemese JK retinde tirkelý talap etilmeidi, biryńǵai tólem mólsherlemesi — 4%. Ońailatylǵan deklaratsiia úshin shekti tabys 600 myń AEK mólsherinde belgilendi, qyzmetkerler sanyna shekteý qoiylmaidy.
Áleýmettik baǵyttaǵy normalar
Ekinshi deńgeidegi jinaqtaýshy zeinetaqy qorynan (BJZQ) tólenetin zeinetaqy tólemderi jeke tabys salyǵynan bosatyldy (elden ketetinder men muragerlik tólemderden basqa).
Kólik salyǵy boiynsha:
- 10 jyldan 20 jylǵa deiingi jeńil avtomobilderge — 30%-ǵa,
- 20 jyldan asqan avtokólikterge — 50%-ǵa tómendetilgen mólsherleme engizildi.
I jáne II toptaǵy múgedektigi bar azamattar úshin áleýmettik salyqtyq shegerim 882 AEK-ten 5 000 AEK-ke deiin ulǵaityldy. Buǵan qosa jeke tabys salyǵy boiynsha jekelegen shegerimderdiń ornyna 30 AEK mólsherindegi biryńǵai ulǵaitylǵan shegerim engizildi.
