«94 myń oqýshy grantqa tapsyrady. Al bólingen grant sany 73 myń. Báseke múldem joq. 1 grantqa 1,5 mektep túlegi talasqan. Meniń oiymsha, Prezidentke durys usynys aitylmaidy nemese jalǵan aqparat beriledi. Osyndai qate usynystyń arqasynda jaqsy oqityn da, úlgerimi nashar da grantqa ie bolady. Nátijesinde ýniversitetter túsiniksiz jaǵdaida qalady», – deidi Erbolat Muhamedjan.
Ol taǵy bir másele – memleket tóleitin grant quny naryqtyq baǵadan birneshe ese tómen dep otyr. Memleket naryqtyq jaǵdaidy ádiletsiz retteitinin aitty.
«Mysaly, ulttyq ýniversitette grant quny – 1 million 300 myń teńge, al memlekettik – 900 myń, jekemenshikke – 700 myń. Aitpaqshy, osydan 3 jyl buryn 350 myń bolyp, sol kezdegi ministr qazirgi somaǵa kótergen edi. Al oqý aqysynyń ózindik quny - 1 -1,5 millionnyń arasy. Bul máseleni jyldam arada sheshpesek, kerisinshe, joǵary bilim salasyna ziian tigizemiz. Sebebi ministrlik osyndai granttyń qunymen sapaly bilimdi talap etýi orynsyz. Sonymen qatar aqyly oqityn stýdent jataqhanany eń sońǵy bolyp ielený kerek», – deidi jýrnalist.
Ol bul máseleni sheshýdiń durys joly bar ekenin aitady. Birinshiden, granttyń sanyn azaityp, artylǵan somaǵa qunyn ósirý kerek dep sanaidy. Sebebi, jyl saiyn granttyń sanyn ósirgennen bilimniń sapasy joǵarylamaidy.
Kerisinshe, erteń myqty ýniversitetter grantqa túsýdiń shekti balyn kóbeitip, nátijesinde ulttyq jáne memlekettik ýniversitetterdegi bilim sapasy odan saiyn nasharlap, jaǵdailary qiyndai túsetinin jetkizdi.
«Ekinshiden, ministrlik ǵalymdardy tikelei qarjylandyrýdy qolǵa alý kerek. Sebebi granttyq qarjylandyrý arqyly, kerisinshe, korrýptsiialyq táýekel bar. Sonymen qatar ol óz nátijesin bermeidi. Eger ýniversitettegi myqty ǵalymdardy tikelei qarjylandyrsa, jaýapkershilikti arttyrýǵa bolar edi. Bul usynystar jeke ózimniń atymnan. Ministrge osyǵan deiin de óz oiymdy jetkizgenmin. Meniń oiymsha, máseleni jyldam arada sheshpesek, salaǵa, kerisinshe, ziian tigizemiz», - deidi Erbolat Muhamedjan.
Derekkóz: qaz365.kz
