Másimovke birden birneshe bap boiynsha aiyp taǵyldy: «Asa iri mólsherde para alý», «Bir top adamdarmen bótenniń senip tapsyrylǵan múlkin asa iri mólsherde urlaý» jáne «Qazaqstannyń memlekettik bóligin shekaradan jáne baqylaý pýnktterinen tys jerde qasaqana zańsyz kesip ótý».
Osylardy eskere otyryp, memlekettik aiyptaýshy barlyq bapty qosqanda jalpy 13 jylǵa bas bostandyǵynan aiyrý jazasyn surady.
«Sottan Nurlan Myrzahanuly Másimovti Qazaqstan Respýblikasy Qylmystyq kodeksiniń 366-babynyń 4-bóliginde, 189-babynyń 4-bóliginde (2-tarmaǵy) jáne 392-babynyń 1-bóliginde kózdelgen qylmystyq quqyq buzýshylyqtardy jasaǵany úshin kináli dep tanýdy suraimyn», - dedi sot talqylaýy barysynda prokýror Azamat Ǵarifýlla.
Sondai-aq prokýror Almaty oblysy Alakól aýdany Aqshi aýylyndaǵy aǵash úi men monshany jáne Almatydaǵy úidi jóndeýge jumsalǵan 16 million teńgeniń múlkin tárkileý qajet dep esepteidi. Aiyptaýshy taraptyń aitýynsha, bul dúieler kásipkerden para retinde alynǵan.
Sondai-aq memlekettik aiyptaýshy Nurlan Másimovti memlekettik qyzmette, memlekettik organdarda jáne qarjy institýttarynda qyzmet atqarý quqyǵynan aiyrý kerek dep esepteidi.
Aitpaqshy, tergeý málimetteri boiynsha, 2020 jyldyń sáýir aiynda Nurlan Másimov óziniń orynbasary Damir Sirazidimovke senimdi adam, iaǵni Almaty oblysy, Alakól aýdany, Aqshi aýylyndaǵy aǵash úiden ózine eki qabatty kottedj ben monshany tegin salyp beretin, sonymen qatar Almaty qalasynda ornalasqan úiiniń jertólesin saýna men demalys bólmesine qaita jabdyqtap, jóndep beretin kásipker tabýdy tapsyrǵan.
Másimov oǵan bul qyzmeti úshin Pavlodar oblysy politsiia departamentiniń memlekettik satyp alý konkýrsyn jeńip alýǵa kómektesýge ýáde bergen. Saldarynan memleketke 420 million teńgeden astam shyǵyn keltirilgen.
Sot talqylaýynda Nurlan Másimov shekaradan ótkeni úshin ǵana kinásin moiyndaitynyn eske saldy. Sonymen qatar, Pavlodar oblysy PD-niń eks-basshysy bul is oidan qurastyrylǵanyn, ózi men basqa aiyptalýshylardy elimizde bolyp jatqan jaǵdaidyń qurbany dep esepteitinin aitty.
«Meniń familiiam úshin ǵana bárimiz jaǵdaidyń qurbany bolyp otyrmyz. Qańtar oqiǵasynan bir jyl buryn memlekettik satyp alý máselesi kóterilse, bárimiz bul jerde otyrmas edik. Esińizde bolsyn, protsedýralardy kóptegen memlekettik organdar birneshe ai boiy tekserdi, qylmys quramy bolmaǵan.
Al ótken jyldyń basynda kenetten qylmystyq quram paida boldy. Is ashyldy, qazir biz sotta jatyrmyz, sol jerde aiyptaýshy taraptyń qisynsyz dálelderi keltirilip jatyr.
Prokýror meni generaldyq shenimnen, prezidenttiń eńbegim úshin bergen «Aibyn» ordeninen aiyrýdy talap etedi. Meni marapat pen ataqtan aiyratynyn bilemin. Biraq men olarǵa óz eńbegimmen qol jetkizdim. Qyzmettiń barlyq satysynan óttim, adamdardy qutqardym, jaraqat aldym. Al men adal ómir súretinimdi bilemin. Al sizderden, qurmetti alqabiler, ar-ujdandy basshylyqqa alýlaryńyzdy suraimyn», – dedi Nurlan Másimov
Atyshýly is boiynsha sot úkimi aldaǵy kúnderde shyǵady.
Eske salaiyq, Nurlan Másimov ótken jyldyń 13 shildesinde shekaradan ótpek bolǵan jerinde reseilik tarap ustaǵan bolatyn. Bul týraly QR UQK habarlady.
Sýret: Orda.kz
