Belarýs strimeri Andrei Býrim, áleýmettik jelide Mellstroi atymen tanymal, Kiprde politsiia ony Qazaqstannyń suraýy boiynsha tapqanyn málimdedi. Alaida Qazaqstannyń Qarjylyq monitoring agenttigi onyń Kiprde ustalǵany týraly aqparatty ázirge rastaǵan joq, dep habarlaidy Dala News.
30 qyrkúiekke qaraǵan túni Býrim Telegram-arnasynda qarańǵy jerde túsirilgen qysqa video jariialaǵan. Ol videoda politsiianyń ózin Qazaqstannyń suraýy boiynsha tapqanyn aitqan. Keiin bul jazba arnadan óshirilgen. Býrimniń ózi de, onyń ókilderi de keiin bailanysqa shyqpaǵan.
Osydan keiin áleýmettik jelilerde strimerdiń Kiprde ustalǵany jáne Qazaqstanǵa ekstraditsiialanýy múmkin ekeni týraly aqparat tarady. Sonymen qatar jeli qoldanýshylary Erdjan – Stambul – Astana baǵyty boiynsha ushatyn PGT1913 reisine nazar aýdarǵan. Alaida Býrimniń osy ushaqta bolǵanyn rastaityn aqparat joq.
Qazaqstannyń Qarjylyq monitoring agenttigi qazirgi ýaqytta Mellstroidyń ustalǵanyn nemese Qazaqstanǵa jetkizilgenin resmi túrde rastaǵan joq. Agenttiktiń málimetinshe, Andrei Býrim áli de Qazaqstannyń suraýy boiynsha halyqaralyq izdeýde.
Buǵan deiin QMA Býrimge qatysty qylmystyq isti tergep jatqanyn habarlaǵan. Agenttik ony Qazaqstan azamattaryna da baǵyttalǵan Mellstroy.game onlain-kazinosyn keń kólemde jarnamalaý naýqanyn uiymdastyrdy dep kúdiktenedi. Vedomstvonyń málimetinshe, strimer TikTok, YouTube Shorts jáne basqa da áleýmettik jelilerde kazinony jarnamalaýǵa arnalǵan túrli baiqaýlar men chellendjder uiymdastyrǵan.
Býrim Qazaqstanda halyqaralyq izdeýge jariialanǵan. Oǵan qatysty sot syrttai qamaýǵa alý túrindegi bultartpaý sharasyna sanktsiia bergen.
Qazir áleýmettik jelide onyń Kiprde naqty ustalǵany, deportatsiia bastalǵany nemese Qazaqstanǵa jóneltilgeni týraly rastalmaǵan aqparat taraýda. Sondyqtan bul málimetterdi ázirge resmi rastalǵan fakt retinde qarastyrýǵa bolmaidy.
Redaktsiia resmi saýaldy jaýapty ókilderge jiberdi.
