Astanada bloger Erbolat Janabylovqa qatysty otbasylyq-turmystyq janjalǵa bailanysty ákimshilik is qaralyp, taraptardyń tatýlasýyna bailanysty is júrgizý toqtatyldy. Sot otyrysy bastapqyda BAQ ókilderi úshin ashyq dep kútilgenimen, keiin Janabylovtyń ótinishimen jabyq rejimge aýystyryldy, dep habarlaidy dalanews.kz.
2026 jylǵy 1 qazanda Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda Janabylovqa qatysty Ákimshilik quqyq buzýshylyq týraly kodekstiń 73-babynyń 1-bóligi boiynsha ákimshilik is qaraldy.
Sottyń málimetinshe, quqyq buzýshylyqqa qatysty oqiǵa 30 qyrkúiekte bolǵan. Janabylov úide janjal shyǵaryp, jubaiynyń qolynan ustap, onyń tynyshtyǵyn buzǵan. Sot materialdarynda atalǵan áreketterde qylmystyq quqyq buzýshylyq belgileri bolmaǵany kórsetilgen.
Is boiynsha jinalǵan materialdardyń ishinde áleýmettik jelidegi beinejazba da bolǵan. Sot otyrysynda Janabylov hattamada kórsetilgen mán-jailardy rastaǵan, quqyq buzýshylyq jasaǵanyn moiyndap, óz áreketine ókinetinin aitqan.
Jábirlenýshi Tólegenova sotta jubaiy ózin uryp-soqpaǵanyn, olardyń arasynda sózge kelispeýshilik bolǵanyn túsindirdi. Sonymen qatar ol Janabylovpen tatýlasýǵa nietti ekenin aityp, tatýlasý týraly kelisimge eshqandai qysymsyz, óz erkimen qol qoiǵanyn rastaǵan.
Sot Janabylovtyń bul quqyq buzýshylyqty alǵash ret jasaǵanyn, buǵan deiin ákimshilik jaýapkershilikke tartylmaǵanyn jáne kinásin tolyq moiyndaǵanyn eskerdi. Jaýaptylyqty aýyrlatatyn mán-jailar anyqtalmaǵan.
ÁQBtK-niń 64-babyna sáikes, 73-bapta kózdelgen quqyq buzýshylyqty alǵash ret jasaǵan adam jábirlenýshimen tatýlasqan jáne keltirilgen ziiandy ótegen jaǵdaida ákimshilik jaýaptylyqtan bosatylýy múmkin. Osyǵan bailanysty sot taraptardyń tatýlasýyna bailanysty is boiynsha is júrgizýdi toqtatý týraly sheshim qabyldady.
Qaýly ázirge zańdy kúshine engen joq.
Sot nege jabyq ótti?
Búgingi sot otyrysyna jýrnalister bastapqyda ashyq protsess bolady degen aqparatpen kelgen. Alaida otyrys bastalǵan kezde sot Janabylov pen jábirlenýshi taraptan BAQ ókilderiniń protseske qatysýyna qatysty pikir surady. Janabylov jýrnalisterdiń zalda bolýyna jáne ózin foto-videoǵa túsirýge qarsylyq bildirdi. Onyń aitýynsha, is jeke jáne otbasylyq ómirine qatysty. Elmira Tólegenova da protsesti jabyq qaraýdy qoldady.
Osydan keiin sot eki taraptyń da ustanymyn eskerip, isti jabyq sot otyrysynda qaraý týraly sheshim qabyldady. Nátijesinde sotqa kelgen jýrnalister protsestiń qalǵan bóligine qatysa almady.
Janjal qalai bastaldy?
Oqiǵa 30 qyrkúiek kúni keshke áleýmettik jelide Elmira Tólegenovanyń jariialanymdarynan keiin kópshilikke belgili boldy. Ol úidegi jaǵdai týraly aityp, garderob bólmesine kirip, esikti ishinen jaýyp alǵanyn kórsetti. Keiin Tólegenova kúieýi ony urmaǵanyn, janjaldyń telefonyn tartyp alýǵa bailanysty bolǵanyn naqtylady.
Astana qalasynyń politsiia departamenti áleýmettik jelidegi jariialanymnan keiin oqiǵa ornyna barǵan. Tekserý barysynda erli-zaiyptylar arasynda turmystyq janjal bolǵany anyqtalǵan. Tólegenova politsiiaǵa resmi aryz jazýdan bas tartqanymen, Janabylovqa qatysty otbasylyq-turmystyq qatynastar salasyndaǵy quqyq buzýshylyq boiynsha ákimshilik hattama toltyrylyp, materialdar sotqa joldanǵan.
Sondai-aq politsiia Janabylovtyń 28 tamyzda probatsiialyq baqylaý talaptaryn buzǵanyn anyqtaǵan. Ol saǵat 22:00-den keiin kórsetilgen mekenjaida bolmaǵan. Bul fakt boiynsha da materialdar sotqa jiberilgen.
Buǵan deiin Janabylovtarǵa qandai úkim shyqqan?
Erbolat Janabylov pen Elmira Tólegenovaǵa qatysty buǵan deiin bólek qylmystyq is qaralǵan. 2026 jylǵy 27 sáýirde Astana qalasynda sot blogerlerdi zańsyz kásipkerlikpen ainalysý jáne qylmystyq jolmen alynǵan aqshany zańdastyrý baptary boiynsha kináli dep tanydy.
Janabylovqa eki jyl bas bostandyǵynan aiyrý jazasy taǵaiyndalyp, jaza shartty dep esepteldi jáne oǵan probatsiialyq baqylaý belgilendi. Tólegenovaǵa da eki jyl bas bostandyǵynan aiyrý jazasy taǵaiyndalyp, ony óteý eki jylǵa keiinge qaldyryldy. Eki jaǵdaida da múlikti tárkileý kózdelgen.
Osylaisha, 30 qyrkúiekte áleýmettik jelide bastalǵan otbasylyq janjal 1 qazanda sotqa jetti. Alaida sotta eki tarap ta tatýlasatynyn málimdep, nátijesinde ákimshilik is toqtatyldy. Bastapqyda jýrnalister qatysady dep kútilgen protsess sońyna deiin jabyq rejimde ótti.
