Oqý-aǵartý ministri Ǵani Beisembaev Túrkistan oblysyna jumys sapary aiasynda birqatar bilim berý nysandaryn aralady. Ol tehnikalyq jáne kásiptik bilim berý júiesiniń damýyna erekshe kóńil bóldi, - dep habarlaidy Dalanews.kz
Túrkistan joǵary kópsalaly, qolóner kolledji — óńirdegi shejireli oqý oryndarynyń biri. Bul oqý ornynda bolashaq qolónershiler, qysh sheberleri, zergerler, IT mamandary daiarlanýda jáne «Jas maman» jobasy aiasynda «IT», «Qolóner» mamandyqtary boiynsha respýblikalyq deńgeidegi quzyrettilik ortalyqtary jumys isteidi. Kolledjde stýdentter 11 mamandyq, 13 biliktilik boiynsha bilim alady.
Ministr ujymmen kezdesýde Memleket basshysynyń tapsyrmasyna sáikes tehnikalyq jáne kásiptik bilim berý júiesin jańa formatta damytýǵa qatysty negizgi mindetterdi atap ótti.
«Biyldan bastap kolledjderge jan basyna shaqqandaǵy qarjylandyrý kólemi eki esege artady. Bul — oqý oryndarynyń materialdyq-tehnikalyq bazasyn jańartýǵa, sondai-aq pedagogterdiń kásibi biliktiligin arttyrýǵa, jańa tehnologiialardy engizýge jol ashady. Sonymen qatar kolledjderdiń oqý-óndiristik bazasynda óndirilgen ónimderdi naryqqa shyǵaryp, tabys tabý múmkindigin qarastyryp jatyrmyz. Túsken qarjy oqý ornynyń damýyna baǵyttalady. Kolledjder zaman talabyna sai ikemdelip, zamanaýi infraqurylymmen jabdyqtalǵan, bilikti mamandarmen qamtylǵan, suranysqa sai sapaly kadr daiarlaityn ortalyqqa ainalýy kerek. Kolledjderge investitsiia tartýda seriktestermen yntymaqtastyqty arttyrý mańyzdy», — dedi ministr.
Ministr sondai-aq «Jaily mektep» ulttyq jobasy aiasynda salynǵan №33 mektepte boldy. Óńirde 29 jaily mekteptiń qurylysy júrgizilýde. Qazirgi ýaqytta onyń ishinde 13 mektep paidalanýǵa berilgen. Ministr pedagogikalyq quram men oqý protsesin uiymdastyrý sapasyn kúsheitýdi tapsyrdy.
Qazirgi ýaqytta óńir halqyna bilim berý júiesinde 50 kolledj, 1100-den astam mektep pen 1426 balabaqsha qyzmet kórsetedi. Biyl kolledjderge 15 myńnan astam memlekettik grant bólinip, agrohimiia, lift sharýashylyǵy, ushý apparattarynyń operatory, jylyjai sharýashylyǵy sekildi jańa 11 jumysshy mamandyǵyna litsenziia alynǵan.
