Prokýror Dana Sársenbai Sherzat Polattyń ólimine qatysty is boiynsha jaryssóz barysynda eki áiel – Dana Jaqsykeldi men Elmira Nurbekovaǵa qatysty jeke qaýly shyǵarýdy surady, dep habarlaidy Dalanews.kz.
Aiyptaýshy taraptyń málimdeýinshe, bul ekeýi sot otyrysynda birqatar mańyzdy derekterdi ádeii jasyrǵan.
Sársembaidyń aitýynsha, olar shok jaǵdaiynda bolmaǵan, kerisinshe, sanaly túrde únsiz qalǵan. Bul tujyrym kóliktegi beinejazbalar arqyly dáleldengen. Atap aitqanda, Abzaldyń olarmen kólikte otyryp, «aýyzdaryńnan eshteńe shyqpasyn» dep aitqany anyq estilgen. Alaida sot otyrysynda áielder bul jaitty múlde aitpaǵan.
Prokýror olardyń áreketterin tiisti protsessýaldyq sheshim qabyldaýdy qajet etetin mán-jai dep baǵalap, jeke qaýly shyǵarýdy usyndy.
Sonymen qatar, prokýror Dana Sársenbai kýáger retinde jaýap bergen Qazykenov pen Rozybaevqa da protsessýaldyq shara qoldaný qajet ekenin atap ótti.
Eske salaiyq, buǵan deiin memlekettik aiyptaýshy Dana Sársenbai sotta sóilegen sózinde Sherzatqa pyshaq salǵan Shynasyl ekeni tolyqtai dáleldengenin aitqan edi.
Onyń ishinde kúdikti retinde bergen jaýabynda «Sherzatqa pyshaq suǵyp aldym» degen sózi bar ekenin eske saldy.
Sot otyrysy barysynda qorǵaý quqyǵy bar Jaqsykeldiniń jáne sottalýshylardyń biri Abzaldyń tóbelesten keiin pyshaǵyn jýyp jatqanyn aitqan. Bul – istegi mańyzdy epizodtardyń biri retinde tirkeldi.
Saraptama nátijesine súiensek, Sherzattyń sol jaq ókpesiniń joǵarǵy bóligindegi jaraqat onyń ólimine sebep bolǵan jáne ol densaýlyqqa aýyr ziian keltiretin jaraqat retinde baǵalanǵan.
Prokýror sarapshy Halimnazarovtyń qorytyndysyn keltirip, jaraqattyń tereńdigi 12 sm bolǵanyn, al Shynasyldan alynǵan pyshaqtyń júzi 9,5 sm ekenin aitty. Sarapshynyń pikirinshe, adamnyń terisi serpimdi bolǵandyqtan, pyshaq sabynyń túbine deiin kirip ketken. Bul – pyshaqtyń úlken kúshpen salynǵanyn kórsetedi.
Dana Sársenbai Shynasyldyń sotty shatastyrý úshin ártúrli jaýap bergenin atap ótip, onyń sózine senýge bolmaitynyn jetkizdi. Prokýrordyń aitýynsha, Sherzatqa pyshaq salǵan naqty tulǵa – Shynasyl Abzal ekeni tolyq dáleldengen. Bul jaitty eki birdei sarapshy da rastaǵan.
Sonymen qatar,prokýrorlar kúdiktilerdi qansha jylǵa sottaýdy talap etkeni belgili boldy.
