پروكۋرور دانا سارسەنباي شەرزات پولاتتىڭ ولىمىنە قاتىستى ءىس بويىنشا ءجارىسسوز بارىسىندا ەكى ايەل – دانا جاقسىكەلدى مەن ەلميرا نۇربەكوۆاعا قاتىستى جەكە قاۋلى شىعارۋدى سۇرادى، دەپ حابارلايدى Dalanews.kz.
ايىپتاۋشى تاراپتىڭ مالىمدەۋىنشە، بۇل ەكەۋى سوت وتىرىسىندا ءبىرقاتار ماڭىزدى دەرەكتەردى ادەيى جاسىرعان.
سارسەمبايدىڭ ايتۋىنشا، ولار شوك جاعدايىندا بولماعان، كەرىسىنشە، سانالى تۇردە ءۇنسىز قالعان. بۇل تۇجىرىم كولىكتەگى بەينەجازبالار ارقىلى دالەلدەنگەن. اتاپ ايتقاندا، ابزالدىڭ ولارمەن كولىكتە وتىرىپ، «اۋىزدارىڭنان ەشتەڭە شىقپاسىن» دەپ ايتقانى انىق ەستىلگەن. الايدا سوت وتىرىسىندا ايەلدەر بۇل جايتتى مۇلدە ايتپاعان.
پروكۋرور ولاردىڭ ارەكەتتەرىن ءتيىستى پروسەسسۋالدىق شەشىم قابىلداۋدى قاجەت ەتەتىن ءمان-جاي دەپ باعالاپ، جەكە قاۋلى شىعارۋدى ۇسىندى.
سونىمەن قاتار، پروكۋرور دانا سارسەنباي كۋاگەر رەتىندە جاۋاپ بەرگەن قازىكەنوۆ پەن روزىبايەۆقا دا پروسەسسۋالدىق شارا قولدانۋ قاجەت ەكەنىن اتاپ ءوتتى.
ەسكە سالايىق، بۇعان دەيىن مەملەكەتتىك ايىپتاۋشى دانا سارسەنباي سوتتا سويلەگەن سوزىندە شەرزاتقا پىشاق سالعان شىناسىل ەكەنى تولىقتاي دالەلدەنگەنىن ايتقان ەدى.
ونىڭ ىشىندە كۇدىكتى رەتىندە بەرگەن جاۋابىندا «شەرزاتقا پىشاق سۇعىپ الدىم» دەگەن ءسوزى بار ەكەنىن ەسكە سالدى.
سوت وتىرىسى بارىسىندا قورعاۋ قۇقىعى بار جاقسىكەلدىنىڭ جانە سوتتالۋشىلاردىڭ ءبىرى ابزالدىڭ توبەلەستەن كەيىن پىشاعىن جۋىپ جاتقانىن ايتقان. بۇل – ىستەگى ماڭىزدى ەپيزودتاردىڭ ءبىرى رەتىندە تىركەلدى.
ساراپتاما ناتيجەسىنە سۇيەنسەك، شەرزاتتىڭ سول جاق وكپەسىنىڭ جوعارعى بولىگىندەگى جاراقات ونىڭ ولىمىنە سەبەپ بولعان جانە ول دەنساۋلىققا اۋىر زيان كەلتىرەتىن جاراقات رەتىندە باعالانعان.
پروكۋرور ساراپشى حاليمنازاروۆتىڭ قورىتىندىسىن كەلتىرىپ، جاراقاتتىڭ تەرەڭدىگى 12 سم بولعانىن، ال شىناسىلدان الىنعان پىشاقتىڭ ءجۇزى 9،5 سم ەكەنىن ايتتى. ساراپشىنىڭ پىكىرىنشە، ادامنىڭ تەرىسى سەرپىمدى بولعاندىقتان، پىشاق سابىنىڭ تۇبىنە دەيىن كىرىپ كەتكەن. بۇل – پىشاقتىڭ ۇلكەن كۇشپەن سالىنعانىن كورسەتەدى.
دانا سارسەنباي شىناسىلدىڭ سوتتى شاتاستىرۋ ءۇشىن ءارتۇرلى جاۋاپ بەرگەنىن اتاپ ءوتىپ، ونىڭ سوزىنە سەنۋگە بولمايتىنىن جەتكىزدى. پروكۋروردىڭ ايتۋىنشا، شەرزاتقا پىشاق سالعان ناقتى تۇلعا – شىناسىل ابزال ەكەنى تولىق دالەلدەنگەن. بۇل جايتتى ەكى بىردەي ساراپشى دا راستاعان.
سونىمەن قاتار،پروكۋرورلار كۇدىكتىلەردى قانشا جىلعا سوتتاۋدى تالاپ ەتكەنى بەلگىلى بولدى.
