Kaspii Qubyr konsortsiýmynyń (KQK) aktsionerleri "Kropotkinskaia" munai aidaý stansasyna (MAS) jóndeý jumystaryn júrgizýdi qoldaýǵa daiyn. Bul týraly 2025 jyldyń 25-26 aqpanynda Abý-Dabide ótken jinynda belgili boldy, dep habarlaidy Dalanews.kz.
"KQK bas direktory Nikolai Gorban baiandama jasap, MAS-tyń zaqymdanýy, jabdyqtyń aǵymdaǵy jai-kúii, merdigerlerdi jumyldyrý deńgeiine qatysty málimetterdi usyndy. Konsortsiým aktsionerleri jóndeý jumystaryn júrgizýge bailanysty kez kelgen máseleler boiynsha sharalardy qoldaýǵa daiyn ekendikterin bildirdi. Jóndeý jumystary shamamen eki aiǵa sozylady dep kútiledi", delingen habarlamada.
KQK teńiz terminalynda 2024 jyly 63 mln tonna munai tielgen bolatyn. 2024 jyly atalǵan júie boiynsha munai tasymalynan túsken túsim 2,3 milliard dollardy quraidy. 1,3 milliard dollar dividend retinde tólendi. 23 aqpandaǵy jaǵdai boiynsha KQK teńiz terminalynan CPC Blend sortyndaǵy 9,8 mln tonna munai 89 tankerge tieldi.
2025 jylǵy 17 aqpanda Kaspii qubyr konsortsiýmynyń (KQK) mańyzdy munai nysany – "Kropotkinskaia" munai aidaý stantsiiasy drondardyń shabýylyna ushyrady.
Resmi málimetke sáikes, stantsiia personaly arasynda zardap shekkender joq. Qazaqstan munaiyna shekteý qoiylǵan joq. Degenmen, "Teńiz – Novorossiisk" qubyr júiesi arqyly munai tasymaldaý qýaty ýaqytsha tómendetildi. "Transneft" Qazaqstannyń Kaspii qubyr konsortsiýmy (KQK) arqyly munai aidaý kólemi shamamen 30 paiyzǵa qysqarýy múmkin ekenin boljady. 19 aqpanda Syrtqy ister ministriniń birinshi orynbasary Aqan Rahmetýllin Astananyń Kievpen Kaspii qubyr konsortsiýmynyń munai aidaý stantsiiasyna jasalǵan drondar shabýylyna qatysty máseleni talqylaityndaryn málimdedi. Resei Federatsiiasynyń tergeý komiteti Kaspii qubyr konsortsiýmy - azamattyq nysanyna jasalǵan shabýyl faktisi boiynsha qylmystyq is qozǵaǵany da belgili boldy. Bul másele Parlamentte de kóterildi.
