2024 jylǵy 22 qazanda Almatyda ekinshi Qazaqstan-Aýǵanstan biznes-forýmy ótti. Forým qorytyndysy boiynsha jalpy somasy 317,6 mln AQSh dollaryn quraityn saýda-ekonomikalyq yntymaqtastyq týraly 23 qujatqa qol qoiyldy, dep habarlaidy Dalanews.kz.
Is-sharaǵa Qazaqstan men Aýǵanstannan 300-den astam delegat qatysty.
"Forým aiasynda B2B kezdesýler ótip, yntymaqtastyqtyń jańa baǵyttary talqylandy. Qol jetkizilgen kelisimder aiasynda alty qazaqstandyq kompaniia aýǵan tarapymen un jáne dándi daqyldardy jetkizýge kelisti. Olardyń jalpy somasy 37 mln AQSh dollarynan asady", delingen Saýda jáne integratsiia ministrliginiń habarlamasynda.
Sonymen qatar, astyq ónimderin jetkizý boiynsha 179 mln AQSh dollaryna memorandýmdarǵa qol qoiyldy. Raps, kúnbaǵys jáne soia burshaǵyn jetkizýge arnalǵan kelisimder de jasaldy. Forým aiasynda jasalǵan kelisimder eki eldiń ekonomikalyq bailanystaryn nyǵaitady jáne biznes úshin jańa múmkindikter ashady.
Aita ketsek, buǵan deiin ekportqa baǵyttalatyn Qazaqstan astyǵynyń basym bóligin tutynatyn Aýǵanstan kólemdi qysqarta bermek niette ekenin jazǵan bolatynbyz. Sebebi munda buryn kóknár sebilip kelgen alqapqa bidai salyna bastaǵan. Sondyqtan jergilikti diqanshylar syrttan ákelinetin bidaiǵa embargo jariialaýdy suraýda. Onyń ústine biyl Aýǵanstanda bidai men unǵa salynatyn baj salyǵynyń kólemi kóterilgen. Máselen, buryn 1 tonna bidai úshin olar 25 dollar baj tóleitin bolsa, qazir ol 40 dollarǵa jýyqtapty. Un úshin 35 dollar tólep kelse, al baj salyǵy qosylsa, ol 55 dollar bolmaq. Sol sekildi buryn Aýǵanstan Qazaqstannan alǵan astyqty ary qarai Pákistanǵa satyp, paida tapqan. Qazir buǵan da tyiym salynypty...
