Batys Qazaqstannyń óndiristik ujymdary vaktsina saldyrýda belsendilik tanytýda
Bul týraly BQO kásipkerlik basqarmasynyń baspasóz qyzmeti habarlady.
Dýman úsh jyldan beri Oraldaǵy jihaz zaýytynda operator bolyp eńbek etip júr. Arnaýly bilim almaǵan. Kásiporynǵa kelgennen keiin tájiribe jinaqtap, qazir kásibi maman boldy. Zaýytta jumysshylar da, tutynýshylar da kóp. Sondyqtan qaýipsizdik basty nazarda. Dýman elde dert dendegen ýaqytta beijai qalmai, vaktsina saldyrdy. Qazir burynǵydai qorqynysh joq ekenin aitady.
Aýyrǵan joqpyn. Jaqsy qabyldadym. Eń birinshi ózińniń qaýipsizdigiń úshin ǵoi. Sosyn ortańdaǵy adamdardyń qaýipsizdigi úshin. Almaǵan adamdarǵa alýǵa keńes beremin, - dedi Dýman Naǵiev.
BQO-da eń úlken jihaz zaýyty jumys isteidi. Munda myńǵa jýyq adam eńbek etedi. Óndiris ornynda shyǵarylǵan taýarlarǵa suranys joǵary. Respýblikanyń barlyq aimaǵymen qatar, Resei, Armeniia, Qytai, Túrkiia elderine de eksporttalady. Ishki jáne syrtqy naryqta qyzý jumys júrip jatqandyqtan, árbir eńbekkerdiń róli men densaýlyǵy mańyzdy. Olar kún saiyn júzdegen bógde adammen bailanysta bolady. Sondyqtan ujymnyń shamamen 95 paiyzy indetke qarsy ekpe saldyryp úlgergen. Bul kórsetkish – jergilikti kásiporyndar arasyndaǵy joǵary nátije.
Men adamdardy jappai vaktsinalaý durys dep oilaimyn. Qaterli dertti qoǵam bolyp jeńýimiz kerek. Bizdiń ujymda basynda birazy júreksingeni ras. Meditsinalyq qyzmetkerler kásiporynǵa kelip, jumysshylarmen kezdesýler ótkizdi. Túsindirý jumystarynan soń óz erkimen ekpe saldyrǵandar úlesi kúrt artty. Bizdiń fabrikada osyǵan deiin eshkim indet juqtyrǵan joq. Degenmen barlyǵy saqtyq úshin osyndai sheshim qabyldap jatyr, - dedi kásiporynnyń bas direktory Mihail Pshenichnyi.
Nan ónimderi kombinatynda da vaktsinalaý naýqany qarqyndy. Óz erkimen ekpe saldyrǵandardyń biri Dinara Kárimova dertke qatysty úrei men kúmánnen arylǵanyn jetkizdi. Tájiribeli maman kásiporynda 11 jyldan beri qyzmet atqaryp keledi. Ol qambadaǵy bidai men óndirilgen unnyń sapasyna jaýapty. Al iri kambinattyń nan ónimderi júzdegen dúkenniń sóresi men myńdaǵan shańyraqtyń dastarhanynda turady. Tiisinshe óndiris ornynda sanitarlyq-epidemiologiialyq talaptardy eskermeýge múlde bolmaidy.
Ózimniń, januiamnyń, áriptesterimniń jáne barlyq tutynýshynyń densaýlyǵyn oiladym. Nan ónimderi kúndelikti tutynatyn eń qajetti taǵam. Al ony biz óndiretin bolǵandyqtan, barynsha saq bolýymyz kerek, - dep atap ótti kásiporynnyń zerthana mamany.
Bul kombinatta 225 adam eńbek etedi. Táýligine 20 tonna makaron, 260 tonna un óndiriledi. Ónimder jergilikti naryqqa jáne Resei, Ózbekstan elderine shyǵarylady. Kásiporyn aimaqta alǵashqylardyń biri bolyp vaktsinalaý naýqanyna qoldaý kórsetken edi. Búginde ekpe alǵandardyń úlesi 90 protsentten asty.
Kásiporyn jumysshylarynyń 195-i vaktsina saldyrdy. Al qalǵan adamdar densaýlyǵyna bailanysty saldyra almady. Pandemiia kezinde óndiris qýaty tómendedi. Tabys kólemi de azaidy. Al daǵdarystan shyǵyp, jumysty odan ári jandandyrý úshin eńbek kúshi men olardyń densaýlyǵyna basym baǵyt berildi. Qazir ujymdyq immýnitet qalyptastyryp, tabysty eńbek etip jatyrmyz, - dedi kadr bóliminiń mamany.
Aimaqta iri kásiporyndar jeterlik. Árbir zaýytta keminde júzdegen adam tabys taýyp júr. Eńbek ujymdary dertke qarsy qoǵam bolyp jumylýdy jón kórip, jappai úles qosyp jatyr.
