QazUÝ-ǵa arnaiy kelgen kórnekti ǵalym aldymen qazaq-qyrǵyz yntymaqtastyǵyna arnalǵan kitap jáne sýret kórmesin tamashalap, QazUÝ qalashyǵy qurylysynyń ekinshi kezeńin iske asyrý josparymen tanysty.
Akademik Asqar Aqaevtyń «Kóne dáýirden bergi demografiialyq damý kórsetkishi jáne adamzat bolashaǵy (kompiýterlik boljaý jáne matematikalyq modeldeý)» taqyrybyndaǵy kóshbasshylyq dárisine kórnekti memleket jáne qoǵam qairatkerleri, UǴA akademikteri, ǵalymdar, qalamgerler, ǴZI basshylary, QazUÝ Direktorlar keńesiniń músheleri, BAQ ókilderi, bilim ordasynyń oqytýshy-professorlar quramy men stýdentteri qatysty.
QazUÝ rektory Janseiit Túimebaev qurmetti meimanǵa arnaiy shaqyrtýdy qabyl alyp, ýniversitetke kelgeni úshin alǵys aitty, ǵylymdy damytýǵa qosqan airyqsha úlesin atap ótti.
«Asqar Aqaiuly – óte bilimdi, erekshe tulǵa. Tájiribeli ǵalym retinde Qyrǵyzstanda esepteý optoelektronika jáne golografiia boiynsha Qyrǵyz ǵylymi mektebin qurdy. Atalmysh ortalyqtan kóptegen ǵalymdar men doktorlar shyqty. Osylaisha professor álemdegi saiasi, ekonomikalyq jáne áleýmettik máselelerdi taldaý men boljaýdyń ǵylymi mektebin qalyptastyrdy. Resei, AQSh, Japoniia jáne Eýropanyń jetekshi ǵalymdarymen birge tereń zertteýler júrgizdi. 400-den astam ǵylymi maqala men 15 kitaptyń avtory», – dedi ýniversitet rektory.
Akademik Asqar Aqaev bilim ordasynyń basshylyǵy men ujymyna jyly qabyldaǵany úshin alǵys bildire otyryp, QazUÝ-ǵa 45 jyldan keiin kelip turǵanyn tolqynyspen jetkizdi.
«QazUÝ-men 45 jyldan soń qaita qaýyshqanyma qýanyshtymyn. Búgingi kezdesýdi uiymdastyrǵandaryńyz úshin kóp raqmet. Ál-Farabi atyndaǵy Qazaq ulttyq ýniversiteti – Ortalyq Aziiadaǵy eń úzdik ýniversitet. Biik tabystarǵa kóptegen joǵary oqý oryndary óte uzaq joldan ótip jetedi. Bul judyryqtai jumylyp eńbek etken bilikti ujymnyń jemisi», – dedi professor.
Dáris barysynda Asqar Aqaiuly «Demografiialyq aýysý» uǵymyna keńinen anyqtama berdi. Sonymen qatar álem elderi tarihyndaǵy demografiialyq ózgerister, onyń sebepteri men saldary týraly aityp berdi.
Kórnekti ǵalym «HH ǵasyrda jer sharyndaǵy halyq sany 4 esege, al álemdik jalpy ishki ónim 20 esege ósti. Demografiialyq aýysý eleýli ǵylymi-tehnikalyq progrespen, mádeniet pen bilimniń órleýimen, sondai-aq halyqtyń kóp bóliginiń aýyldardan qalaǵa kóshýimen qatar júrdi. HHI ǵasyrdyń birinshi jartysynda demografiialyq dinamika álemdik damýdyń basty qozǵaýshy kúshi bolyp qala beretinine kúmánim joq. HH ǵasyrdyń basy kóptegen ǵylymi-innovatsiialyq jobalarmen erekshelendi.
Atap aitqanda: atom energetikasy, kvanttyq elektronika jáne lazerlik tehnologiialar, elektrondy esepteý mashinalary jáne óndiristi avtomattandyrý, reaktivti jáne zymyran qozǵaltqyshtary, ǵalamdyq spýtniktik bailanys jáne teledidar t.b. Al qazir tsifrlyq tehnologiianyń zamany», – degen tujyrymdarymen bólisti.
Sondai-aq, óz sózinde Asqar Aqaev adamzattyń bolashaǵy, órkeniettiń damýy jáne onyń keri áseri týraly óz pikirin bildirdi. Oqytýshy-professorlar quramynyń suraqtaryna jaýap berip, ǵylymdaǵy tájiribesimen bólisti.
Kóshbasshylyq dáristen keiin Janseiit Túimebaev akademik Asqar Aqaevqa Ál-Farabi atyndaǵy Qazaq ulttyq ýnversitetiniń «Qurmetti professory» ataǵyn tabystady.
Shara sońynda Asqar Aqaev QazUÝ-dy úzdik bitirgen doktoranttarǵa saltanatty túrde diplomdaryn tabystap, túlekterge sát-sapar tiledi.
21 maýsym kúni Ó. Joldasbekov atyndaǵy Stýdentter saraiynda Asqar Aqaevtyń «Tsifrlyq ekonomika (nusqalar men boljamdar)» taqyrybyndaǵy ekinshi kóshbasshylyq dárisi ótedi. Dáriste professor tsifrlyq ekonomikanyń búgini men bolashaǵy jáne óziniń ǵylym salasyndaǵy júrgizgen zertteýleri týraly keńinen aitatyn bolady.
Ál-Farabi atyndaǵy QazUÝ-dyń Baspasóz qyzmeti
