Aqtóbe oblysynyń Qoǵamdyq keńesi qalalyq mektepterdiń 80 paiyzyndaǵy ashanalarǵa monitoring júrgizip, birqatar zańbuzýshylyqty anyqtady. Bul buzýshylyqtar sanitarlyq talaptardyń saqtalmaýy men taǵam ónimderiniń jetkiliksiz berilýi siiaqty máselelerge qatysty boldy. Al kásipkerler óz kezeginde qoǵamdyq keńes múshelerin zań talaptaryn buzdy dep aiyptap, baqylaýshy organdarǵa shaǵym túsirdi, dep habarlaidy Dalanews.kz.
Ratel.kz málimetinshe, tekseris kezinde bir mekteptiń ashanasynda ettiń portsiiasy 90 grammnyń ornyna nebary 32 gramm bolǵany anyqtalǵan. Basqa mekemelerde sanitarlyq kitapshalardyń bolmaýy, jaramdylyq merzimi ótip ketken jýǵysh zattardyń qoldanylýy, ydys jýý tártibiniń saqtalmaýy syndy derekter tirkelgen. Keibir jalǵa alýshylar komissiianyń kirýine kedergi keltirip, keiinnen "Atameken" kásipkerler palatasy men prokýratýraǵa shaǵymdanǵan.
Kásipkerler atynan pikir bildirgen QR Bólshek saýda jáne qoǵamdyq tamaqtaný qaýymdastyǵy Qoǵamdyq keńesti kásipkerlik qyzmetke zańsyz aralasty dep aiyptady. Olardyń pikirinshe, keńes sanitarlyq qyzmettiń ókilettigine qol suǵyp, Kásipkerlik kodeksti buzǵan.
Qaýymdastyq óz ýájin Bilim jáne ǵylym ministrliginiń buiryǵymen negizdep otyr. Buiryqqa sáikes, mekteptegi tamaq sapasyn baqylaýdy mektep ákimshiligi men ata-analar komitetinen quralǵan ishki komissiia júzege asyrýy tiis.
Al Qoǵamdyq keńes eshqandai zań buzbaǵanyn málimdedi. Keńes tóraiymy Táttigúl Talaeva tekserý jumystary jalǵa alýshylardyń kelisimimen júrgizilgenin jáne onyń maqsaty – biýdjet esebinen qarjylandyrylatyn memlekettik qyzmet – mekteptegi tamaqtyń sapasyn baǵalaý ekenin atap ótti.
"Biz tek mekteptegi ashanalarda kórsetiletin memlekettik qyzmettiń sapasyn tekserdik. Bul – biýdjettik qarjy esebinen atqarylatyn qyzmet. Al jeke kásipkerliktiń ishki sharýasyna aralasqan joqpyz", – dedi Talaeva.
Onyń aitýynsha, bastaýysh synyp oqýshylaryn tamaqtandyrýǵa biýdjetten 6,8 milliard teńge, áleýmettik osal toptaǵy balalardyń tamaǵyna – 1,7 milliard teńge bólingen.
Talaeva kásipkerlerdiń mektep ashanalaryna aitarlyqtai investitsiia quimaǵanyn alǵa tartty. Degenmen, 2023–2024 jyldary óńirde mektep ashanalaryn jabdyqtaýǵa 300 million teńgeden astam qarjy jumsalǵan.
Sonymen qatar onyń aitýynsha, jalǵa alý aqysy tómen, al bir mekteptiń ózinen túser tabys ai saiyn 100 million teńgege deiin jetýi múmkin. Qoǵamdyq keńes deregine súiensek, bir kásipker 20 mekteptiń, ekinshisi – 13 mekteptiń ashanasyn jalǵa alǵan.
"Sanitarlyq-epidemiologiialyq qyzmet (SES) mektep ashanalaryn tek tamaqtan ýlaný oqiǵasy tirkelgen jaǵdaida ǵana teksere alady. Sonda mindetti túrde bireý ýlanýy kerek pe? Basqa jaǵdaida sanitarlyq dárigerdiń ózi Kásipkerlik kodeksin buzdy dep jaýapqa tartylýy múmkin. Bul – durys pa?", – dep kúiindi Talaeva.
Qoǵamdyq keńes músheleri Aqtóbe mektepterinde Qostanaidan jetkiziletin ýltrapasterlengen sút keńinen qoldanylyp otyrǵanyna da nazar aýdardy. Bul rette óńirde jańa saýylǵan sút óndiretin eki zaýyt jumys istese de, olar mekteptermen jumys istemei otyr.
"Jergilikti óndirýshiler jańa, paidaly sút ónimin jetkizýge daiyn. Biraq olarǵa eshkim kóńil bólmei otyr. Bul máselege jergilikti "Atameken" de múddeli emes siiaqty", – dedi Talaeva.
