Májilis depýtaty Murat Ábenov onlain bilim berý salasyna qatysty tutynýshylardyń quqyǵyn qorǵaýǵa baǵyttalǵan málimdeme jasady. Onyń aitýynsha, eger satyp alynǵan onlain kýrs ýáde etilgen nátije bermese, tutynýshy aqshasyn qaitaryp alýǵa jáne qyzmet kórsetýshiden aiyppul talap etýge tolyq quqyly, dep habarlaidy Dalanews.kz.
“Eger kýrs satyp alyp, aiyna million teńge tabasyń degen jarnamaǵa senip, biraq nátijege qol jetkize almasańyz — mindetti túrde kýrs avtoryna habarlasýyńyz kerek. 10 kún ishinde jaýap bolmasa, jaýap bermegeni úshin aiyppul salynady. Bul — zańmen rettelgen jaǵdai”, — dedi depýtat.
Ábenovtyń aitýynsha, tutynýshy barlyq hat-habarlamany, videojazbalardy, skrinshottardy saqtaý arqyly óz ýájin dáleldei alady. Bul materialdar sotta zańdy dálel retinde qarastyrylady.
“Men aldanyp qaldym, eshteńe istei almaimyn» dep qol qýsyryp otyrýǵa bolmaidy. Árbir azamat zań aiasynda óz quqyǵyn qorǵai alady. Eger kýrs avtory 10 kún ishinde jaýap bermese, tutynýshynyń paidasyna aiyppul óndirilip beriledi”, — dep atap ótti depýtat.
Bul bastama onlain kýrstar naryǵynda tutynýshylar quqyǵynyń qorǵalýyn kúsheitip, sapasyz kontentpen kúreste tiimdi qural bolmaq.
