ءماجىلىس دەپۋتاتى مۇرات ابەنوۆ ونلاين ءبىلىم بەرۋ سالاسىنا قاتىستى تۇتىنۋشىلاردىڭ قۇقىعىن قورعاۋعا باعىتتالعان مالىمدەمە جاسادى. ونىڭ ايتۋىنشا، ەگەر ساتىپ الىنعان ونلاين كۋرس ۋادە ەتىلگەن ناتيجە بەرمەسە، تۇتىنۋشى اقشاسىن قايتارىپ الۋعا جانە قىزمەت كورسەتۋشىدەن ايىپپۇل تالاپ ەتۋگە تولىق قۇقىلى، دەپ حابارلايدى Dalanews.kz.
“ەگەر كۋرس ساتىپ الىپ، ايىنا ميلليون تەڭگە تاباسىڭ دەگەن جارناماعا سەنىپ، ءبىراق ناتيجەگە قول جەتكىزە الماساڭىز — مىندەتتى تۇردە كۋرس اۆتورىنا حابارلاسۋىڭىز كەرەك. 10 كۇن ىشىندە جاۋاپ بولماسا، جاۋاپ بەرمەگەنى ءۇشىن ايىپپۇل سالىنادى. بۇل — زاڭمەن رەتتەلگەن جاعداي”، — دەدى دەپۋتات.
ابەنوۆتىڭ ايتۋىنشا، تۇتىنۋشى بارلىق حات-حابارلامانى، ۆيدەوجازبالاردى، سكرينشوتتاردى ساقتاۋ ارقىلى ءوز ءۋاجىن دالەلدەي الادى. بۇل ماتەريالدار سوتتا زاڭدى دالەل رەتىندە قاراستىرىلادى.
“مەن الدانىپ قالدىم، ەشتەڭە ىستەي المايمىن» دەپ قول قۋسىرىپ وتىرۋعا بولمايدى. ءاربىر ازامات زاڭ اياسىندا ءوز قۇقىعىن قورعاي الادى. ەگەر كۋرس اۆتورى 10 كۇن ىشىندە جاۋاپ بەرمەسە، تۇتىنۋشىنىڭ پايداسىنا ايىپپۇل ءوندىرىلىپ بەرىلەدى”، — دەپ اتاپ ءوتتى دەپۋتات.
بۇل باستاما ونلاين كۋرستار نارىعىندا تۇتىنۋشىلار قۇقىعىنىڭ قورعالۋىن كۇشەيتىپ، ساپاسىز كونتەنتپەن كۇرەستە ءتيىمدى قۇرال بولماق.
