Dúisenbi kúni keshkisin Niý-Iorktegi Hofstra ýniversitetinde AQSh prezidenttigine úmitkerler arasynda ótýge tiis bir jarym saǵatqa sozylatyn úsh debattyń alǵashqysy ótti.
Pikirsaiys tártibi boiynsha birinshi kezekte ekonomikalyq máseleler kóterilý kerek. Demokrattar atynan úmitker Hillari Klinton óte bai amerikalyqtardyń salyqtaryn kóterý arqyly orta toptyń, atap aitqanda stýdent jastar men jas analardyń saýlyǵyna basymdyq beretinin aitty.
Respýblikashyldar atynan úmitker Donald Tramp korporativti salyqty qysqartý arqyly biznes-qaýymdastyqty qoldaitynyn, jas iskerlerdi amerikaǵa tartyp, jumys oryndarynyń kóptep ashylýyna jaǵdai jasaitynyn málimdedi. Ol sonymen birge Salyq kodeksine ózgerister engizetinin de aitty. Ol kezinde Bill Klinton bekitken, Barak Obama qol qoiǵan Soltústikamerikalyq kelisimdi synǵa aldy.
Qatysýshylar elderindegi násildik qarym-qatynas máselesin de kóterdi.
Klintonnyń sózderinshe, sot-tergeý júiesinde násildik, az ulttarǵa qatysty kemsitýshilik baiqalady, buǵan jol bermeý kerek. Klinton sonymen birge qarý-jaraqty satý baqylaýyn kúsheitinin de aitty.
Tramp bolsa quqyq qorǵaý organdaryndaǵy qyzmetkerler sanyn ósirý arqyly tártipti kúsheitemin dedi.
Syrtqy saiasatqa qatysty Klinton Reseidiń Amerikadaǵy partiialyq jáne qoǵamdyq qurylymdarǵa qarsy hakkerlik shabýylyn synǵa aldy. Ony bul eldiń sailaý protsesine kedergi jasaý dep atap ótti.
Tramp bolsa, Reseidiń hakkerlik shabýyldy jasaǵanyn jóninde naqty dálelder joq dedi. Biraq Reseidiń zymyran-iadrolyq arsenalyn jańartyp jatqanyn qaýippen atap ótti. Buǵan Qurama Shtattar tiisinshe jaýap bergen joq dep esepteidi.
Milliarder úmitker Donald Tramp buǵan deiin betpe-bet debatqa qatysqan emes. Hillari Klinton 2008 jyly prezident sailaýy aldynda úmitker Barak Obamamen debatqa shyqty. AQSh-taǵy prezident sailaýy 8 qarashada ótedi.
