Қаржылық мониторинг агенттігінің Алматы қаласы бойынша департаменті 180-нен астам адамды алдап соққан "Boxy Wealth" қаржы пирамидасының қызметін тоқтатты. Қаржы пирамиданың ұйымдастырушысы 2 ай мерзімге қамауға алынды, деп хабарлайды Dalanews.kz.

Қазіргі уақытта 230 млн теңге көлемінде залал келтірілген 180-нен астам азамат жәбірленуші деп танылған.

"Ұйымдастырушылар өздерін инвестициялық компания ретінде таныстырып, салымшыларға жарнамалық материалдарды қарау арқылы жоғары табыс табуды ұсынған. Олар күн сайын 5%-дан 10%-ға дейін, яғни айына 150%-дан астам және жылына 1800%-дан жоғары кіріс табатынына уәде еткен. Сондай-ақ, рефералдық сілтемелер арқылы жаңа қатысушыларды тартқан жағдайда 10% көлемінде дивиденд төлеу қарастырылған. Салымшылардың ақшалай қаражаттары дропперлердің атына рәсімделген банк карталарына қабылданып, кейін жасыру мақсатында пайдаланылған криптовалюта әмияндарына аударылған", делінген ҚМА хабарламасында.

Қаржы пирамиданың ұйымдастырушысы 2 ай мерзімге қамауға алынды.

Тергеу жалғасуда.

Қылмыстық-процестік кодекстің 201-бабына сәйкес өзге ақпарат жария етуге жатпайды.

Бұған дейін ТМД аумағындағы ең ірі криптосервистің қызметі тоқтатылғанын жазғанбыз.