Қазақстандық продюсер Баян Мақсатқызы қазақ киносының аңыз актрисасы Меруерт Өтекешоваға жаңа пәтердің кілтін табыстады. Сонымен қатар ол өнер иесіне Түркияға жолдама сыйлағанын мәлімдеді, деп хабарлайды dalanews.kz.
Баян Мақсатқызының айтуынша, жаңа баспана толықтай тұруға дайын. Пәтер қажетті жиһазбен, тұрмыстық техникамен, асүй жабдықтарымен және өзге де қажетті заттармен қамтамасыз етілген. Продюсердің сөзінше, интерьер дизайнын өзі әзірлеп, әрбір бөлшегін жеке таңдаған.
«Бұл – аңыз тұлғаға деген жүректен шыққан сый. Ол бар жақсылыққа лайық», – деді Баян Мақсатқызы.
Меруерт Өтекешова көрсетілген құрмет пен қамқорлық үшін алғысын білдіріп, мұндай сыйдың өзі үшін күтпеген әрі ерекше қуаныш болғанын айтты.
Меруерт Өтекешова – қазақ кино өнерінің көрнекті өкілі. Ол көрерменге ең алдымен «Қыз Жібек» фильміндегі Жібек бейнесі арқылы кеңінен танылды. Кейінгі жылдары актриса театр мен кинодағы еңбегі үшін түрлі мемлекеттік марапаттарға ие болды.
Соңғы уақытта әлеуметтік желіде Баян Мақсатқызының бұл бастамасы қызу талқыланып, көпшілік аңыз актрисаға көрсетілген құрметке оң бағасын беріп жатыр.
