قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى 180-نەن استام ادامدى الداپ سوققان "Boxy Wealth" قارجى پيراميداسىنىڭ قىزمەتىن توقتاتتى. قارجى پيراميدانىڭ ۇيىمداستىرۋشىسى 2 اي مەرزىمگە قاماۋعا الىندى، دەپ حابارلايدى Dalanews.kz.
قازىرگى ۋاقىتتا 230 ملن تەڭگە كولەمىندە زالال كەلتىرىلگەن 180-نەن استام ازامات جابىرلەنۋشى دەپ تانىلعان.
"ۇيىمداستىرۋشىلار وزدەرىن ينۆەستيسيالىق كومپانيا رەتىندە تانىستىرىپ، سالىمشىلارعا جارنامالىق ماتەريالداردى قاراۋ ارقىلى جوعارى تابىس تابۋدى ۇسىنعان. ولار كۇن سايىن 5%-دان 10%-عا دەيىن، ياعني ايىنا 150%-دان استام جانە جىلىنا 1800%-دان جوعارى كىرىس تاباتىنىنا ۋادە ەتكەن. سونداي-اق، رەفەرالدىق سىلتەمەلەر ارقىلى جاڭا قاتىسۋشىلاردى تارتقان جاعدايدا 10% كولەمىندە ديۆيدەند تولەۋ قاراستىرىلعان. سالىمشىلاردىڭ اقشالاي قاراجاتتارى دروپپەرلەردىڭ اتىنا راسىمدەلگەن بانك كارتالارىنا قابىلدانىپ، كەيىن جاسىرۋ ماقساتىندا پايدالانىلعان كريپتوۆاليۋتا ءامياندارىنا اۋدارىلعان"، دەلىنگەن قما حابارلاماسىندا.
قارجى پيراميدانىڭ ۇيىمداستىرۋشىسى 2 اي مەرزىمگە قاماۋعا الىندى.
تەرگەۋ جالعاسۋدا.
قىلمىستىق-پروسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.
بۇعان دەيىن تمد اۋماعىنداعى ەڭ ءىرى كريپتوسەرۆيستىڭ قىزمەتى توقتاتىلعانىن جازعانبىز.
