يسلامدا جۇلدىزدارمەن تاعدىردى بولجاۋ – سيقىرشىلىققا جاتادى. بۇل تۋرالى پايعامبارىمىز: «كىمدە-كىم قانداي دا ءبىر اقپاراتتى جۇلدىزبەن بولجاپ الاتىن بولسا، ول سيقىرشىلىقتىڭ ءبىر تۇرىمەن اينالىسىپ جاتىر، نەعۇرلىم كوپ اينالىسسا، سوعۇرلىم كوپ كۇنا الادى»[1] – دەگەن. سيقىرشىلىق – قۇردىمعا ۇشىراتاتىن جەتى كۇنانىڭ ءبىرى [2] ەكەن.
سونىمەن قاتار جۇلدىز جورامالعا سەنسەك، قانشاما دۇرىس شەشىمدەردەن باس تارتامىز. ياعني، تاڭەرتەڭ ايتىلعان گوروسكوپتى تىڭداپ، سوعان سايكەس شەشىمدەرىمىزدى بۇرمالاپ، سيقىردىڭ قاشان ورىندالاتىنىن تاپجىلماي كۇتەمىز. بۇل، ارينە، ۇلكەن قاتەلىك. نەگىزى جۇلدىزداردىڭ جاراتىلىسى مەن قىزمەتى جايىندا اللا تاعالا قاسيەتتى قۇراندا: «ول (اللا) – جۇلدىزداردى سەندەردىڭ يگىلىكتەرىڭە، قۇرلىق پەن تەڭىزدىڭ قاراڭعىلىعىندا جول تاۋىپ اداسپاي جۇرۋلەرىڭ ءۇشىن جاراتقان. ءبىز راسىندا دا، بىلىمدىلەر مەن بىلگىسى كەلەتىندەر ءۇشىن (اقيقاتتىڭ) دالەلدەرىن وسىلايشا ەگجەي-تەگجەيلى كەلتىردىك، ءھام اياتتارىمىزدى دا ءدال سولاي تارقاتىپ باياندايمىز» [3].
«راسىندا، ءبىز جەرگە ەڭ جاقىن اسپاندى شامشىراقتارمەن (جۇلدىزدارمەن) بەزەندىردىك ءارى ولاردىڭ ءبىر پاراسىن شايتاندارعا اتىلاتىن وق قىلدىق. ءھام سول شايتاندار ءۇشىن الاۋلاعان وت دايىندادىق»[4] – دەپ اتاپ كورسەتكەن.
استرونوميا عارىشتىق دەنەلەردىڭ قۇرىلىسى، دامۋى، ولار قۇرايتىن عارىشتىق جۇيەلەر جانە تۇتاس عالامدى زەرتتەيتىن عىلىم ءتۇرى. شاريعاتىمىزدا استرونومياعا تىيىم سالىنبايدى. الايدا جەردەگى وقيعالاردىڭ جۇرۋىنە جۇلدىزدار اسەر ەتەدى، بولاشاقتى بولجاي الادى دەپ بىلەتىن استرولوگياعا تىيىم سالىنادى.
قانداي دا ءبىر زاڭدىلىققا نەگىزدەلگەن بولجامدارعا اسىل ءدىنىمىز رۇقسات ەتەدى. مىسالى، مۇسىلمان الەمىندە جۇلدىزداردىڭ ورنالاسۋىنا نەگىزدەلىپ ءتۇرلى ارەكەتتەردى ورىنداۋعا قولايلى نەمەسە قولايسىز ۋاقىتتاردى انىقتاعان، ونىڭ ىشىندە وسىمدىكتەردى وتىرعىزۋ جانە وسى ىستەپەتتەس بولجامدار. بۇل ساۋەگەيلىك ەمەس، كەرىسىنشە قانداي دا ءبىر ءىستى ىستەۋگە دۇرىس ءساتتى تاڭداۋ.
سوندىقتان مۇسىلمان بالاسى استرولوگيالىق بولجامدارعا، ياعني گوروسكوپقا سەنۋگە، ونىڭ نەگىزىندە ءومىر سۇرۋگە بولمايتىندىعىن ءبىلىپ ءجۇرۋى كەرەك. بۇل بولمىسىمىزدى قيىنداتىپ، ومىرىمىزگە تەرىس اسەر ەتەتىنى جاسىرىن ەمەس. تەك تازا نيەتپەن جاقسى ىستەرگە باستاماشى بولا بىلسەك، ونىڭ ناتيجەسى دە كوڭىلىمىزدەن شىعاتىنى حاق.
سىلتەمە:
[1] يبن ابباس.
[2] پايعامبارىمىز (وعان اللانىڭ سالاۋاتى مەن سالەمى بولسىن): «ادامدى وپاتقا (قۇردىمعا) جەتەلەيتىن مىنا جەتى نارسەدەن ساقتانىڭدار: 1) اللاھقا شيرك قوسۋ، 2) سيقىر جاساۋ، دۋالاۋ، 3) ادام ءولتىرۋ، 4) پايىز جەۋ، 5) جەتىمنىڭ مۇلكىن جەۋ، 6) جيھادتا مايداننان قاشۋ، 7) تۇرمىستاعى ار-نامىستى ايەلگە زينا ەتتى دەپ جالا جابۋ.» – دەگەن (بۋحاري، مۋسليم).
[3] «ءانعام» سۇرەسى، 97 – ايات.
[4] «مۇلك» سۇرەسى، 5 – ايات.
