قازۇۋ «مەحانيكا جانە ماتەماتيكا» عزي جانىنداعى كومپيۋتەرلىك عىلىمدار زەرتحاناسىندا يندۋستريالىق سەرىكتەسى «Digital Alem» جشس-مەن بىرلەسىپ بىرەگەي قۇرىلعى جاسالدى. جاس عالىمدار جاڭا جوبامەن ءبىر جارىم جىلداي ۋاقىت اينالىسىپ، وزدەرىنىڭ ەكولوگيالىق مونيتورينگ جۇيەسىن كوپشىلىككە ۇسىندى. نوۋ-حاۋ – بۇل اۋانىڭ لاستانۋ دەڭگەيىن انىقتايتىن، پايدالانۋشىنىڭ تەلەفونىنا Bluetooth ارقىلى قوسىلاتىن جانە دەرەكتەردى سەرۆەرگە جىبەرەتىن شاعىن قۇرىلعى. بۇل قۇرىلعى ادامنىڭ ورنالاسقان جەرىن دە انىقتايدى. ونىڭ سالماعى 150 گرامم، باتارەيامەن جۇمىس ىستەيدى جانە ونى جەلى ارقىلى قۋاتتاۋعا بولادى.
ماگيسترانتتاردىڭ الدىن الا ەسەپتەۋلەرى بويىنشا قۇرىلعىنىڭ وزىندىك قۇنى وتىز مىڭ تەڭگەدەن اسادى. كومپيۋتەرلىك عىلىمدار زەرتحاناسىنىڭ مەڭگەرۋشىسى ەدىل نۇراحوۆ اسپاپتىڭ جۇمىس ءپرينسيپىن بىلاي ءتۇسىندىردى:
– ءبىز ازىرلەگەن مودۋلدەر ءتۇرلى داچيكتەردىڭ كومەگىمەن اۋا الۋدى جۇزەگە اسىرادى جانە دەرەكتەردى GSM/GPRS تاراتقىش ارقىلى سەرۆەرگە جىبەرەدى. سەرۆەر دەرەكتەردى قۇرىلىمدالعان دەرەكقور رەتىندە ساقتايدى. ولار كارتاداعى قالانىڭ ەكولوگيالىق كورىنىسىن بىلۋگە، لاستانۋ ديناميكاسىن انىقتاۋعا جانە ءارتۇرلى فاكتورلاردى ەسكەرە وتىرىپ، ودان ءارى وزگەرىستەر تۋرالى بولجام جاساۋعا مۇمكىندىك بەرەتىن ماتەماتيكالىق مودەلدەرمەن وڭدەلەدى، – دەيدى.
قازۇۋ-دىڭ جاس عالىمدارى الماتىدا لاستانۋ دەڭگەيى وتە جوعارى كەزەڭدە جاڭا ونەرتابىستىڭ قاجەتتىلىگى دە وزەكتى ەكەندىگىن اتاپ ءوتتى. قالا تۇرعىندارى مەن بيزنەس وكىلدەرى تاراپىنان بۇل قۇرىلعى ءوز تۇتىنۋشىسىن تابادى. قالا تۇرعىندارى ءپورتاتيۆتى قۇرىلعىنىڭ كومەگىمەن قالانىڭ عيماراتتارىنداعى، اۋلالارىنداعى نەمەسە اۋداندارىنداعى ەكولوگيالىق جاعدايدى انىقتاي الادى، ال كاسىپكەرلەر ەكو-ونىمدەردىڭ ءتىزىمىن جاساۋ ءۇشىن بيزنەستىڭ باعىتتارىن تاڭداي الادى.
جاڭا قۇرىلعىنى جاساۋشىلار «Smatr Siti» تۇجىرىمداماسى اياسىندا جاڭا قۇرىلعىنى قولدانا وتىرىپ، قالانىڭ ەكولوگياسىن ساقتاۋدىڭ ءتيىمدى قۇرالىن جاساۋعا بولاتىندىعىن اتاپ ءوتتى.
