الماتى قالالىق پوليسيا باسقارماسىنىڭ حابارلاۋىنشا بۇعان شورايەۆتىڭ توتەنشە جاعداي كەزىندە ماقساتتى تۇردە جالعان اقپارات تاراتۋى سەبەپ بولعان. ونىڭ ۇستىنەن ق ر قىلمىستىق كودەكسىنىڭ 274 بابى، 4 تارماعى بويىنشا قىلمىستىق ءىس قوزعالدى.
"شورايەۆ الەۋمەتتىك جەلى ارقىلى شىندىققا سايكەس كەلمەيتىن اقپارات تاراتقان. وسى ارقىلى ول قوعامدىق تارتىپكە قاتەر ءتوندىردى ءارى توتەنشە جاعداي كەزىندە زاڭ جۇزىندە قورعالاتىن قوعام مەن مەملەكەت مۇددەسىنە قايشى ارەكەتكە باردى"، – دەپ مالىمدەدى الماتى قالالىق پوليسيا دەپارتامەنتىنىڭ باسپا ءسوز قىزمەتى.
شورايەۆ قىلمىستىق-پروسەسسۋالدى كودەكستىڭ 128 بابىنا ساي قاماۋعا الىندى. تەرگەۋ امالدارى جۇرگىزىلۋدە.
شورايەۆ سوڭعى ۋاقىتتا بيلىكتى اشىق سىناپ ءجۇردى. ايتالىق ۇلتتىق كەڭەستەن شىعىپ، ونىڭ سەبەبىن - بۇل ۇيىمنىڭ ەشتەڭە شەشپەيتىنىمەن ءتۇسىندىرىپ، ميتينگتەر تۋرالى زاڭ جوباسىنا قاتىستى نارازىلىعىن ءبىلدىردى. قازاق ۇلتشىلدىعىنا قاتىستى ويىن ورتاعا سالدى.
"قازاق ۇلتشىلدىعى بىرەۋدىڭ باسىن جارىپ، كوزىن شىعاردى ما؟ قازاق ۇلتشىلدىعىنىڭ قۇربانى بولعان كىمدى ەستىدىڭىز؟ قازاق ۇلتشىلدىعى كىمنىڭ اسىنا ورتاقتاستى؟ كىمنىڭ ىشكى ىسىنە كيلىكتى؟ قازاقستانداعى تاتۋلىق پەن تۇراقتىلىقتىڭ شايقالماي وتىرعانى دا قازاقتىڭ كونبىستىگى مەن توزىمدىلىگىنىڭ ارقاسى اربىردەن سوڭ..." دەپ مالىمدەگەن ەدى بۇدان بۇرىن ارمان شورايەۆ.
سونىمەن قاتار "سامۇرىق قازىنانى" تاراتۋعا قاتىستى ۇندەۋ جاساپ، قازاقستاننىڭ بايلىعى ءبىر ادامنىڭ قولىندا شوعىرلانعانىن سىن ساداعىنا الدى.
"ۇكىمەت شىرىگەن بايلارعا سالىناتىن سالىقتى ونداعان ەسە ۇلعايتىپ، تۇرمىسى تومەن ازاماتتاردىڭ سالىعىن مەيلىنشە ازايتۋى قاجەت. ونىڭ ىشىندە ءوزىن-وزىن جۇمىسپەن قامتىعاندار، كوپ بالالى وتباسىلار كىرۋى ءتيىس" دەگەن بولاتىن شورايەۆ exclusive.kz سايتىنا بەرگەن سۇحباتىندا.
ارمان شورايەۆ - توقايەۆتىڭ باستاماسىمەن قۇرىلعان ۇلتتىق قوعامدىق كەڭەستىڭ ەكس-مۇشەسى
2006 جىلى - "حابار" اگەنتتىگى باس ديرەكتوردىڭ ورىنباسارى بولدى.
2006-2007 جىلدارى پرەزيدەنت اكىمشىلىگىندە الەۋمەتتىك-ساياسي ءبولىمنىڭ باس مامانى قىزمەتىن اتقاردى.
2007-2014 جىلدارى كتك تەلەارناسىن باسقاردى.
