Almaty qalalyq politsiia basqarmasynyń habarlaýynsha buǵan Shoraevtyń tótenshe jaǵdai kezinde maqsatty túrde jalǵan aqparat taratýy sebep bolǵan. Onyń ústinen QR Qylmystyq kodeksiniń 274 baby, 4 tarmaǵy boiynsha qylmystyq is qozǵaldy.
"Shoraev áleýmettik jeli arqyly shyndyqqa sáikes kelmeitin aqparat taratqan. Osy arqyly ol qoǵamdyq tártipke qater tóndirdi ári tótenshe jaǵdai kezinde zań júzinde qorǵalatyn qoǵam men memleket múddesine qaishy áreketke bardy", – dep málimdedi Almaty qalalyq politsiia departamentiniń baspasóz qyzmeti.
Shoraev qylmystyq-protsessýaldy kodekstiń 128 babyna sai qamaýǵa alyndy. Tergeý amaldary júrgizilýde.
Shoraev sońǵy ýaqytta bilikti ashyq synap júrdi. Aitalyq Ulttyq keńesten shyǵyp, onyń sebebin - bul uiymnyń eshteńe sheshpeitinimen túsindirip, mitingter týraly zań jobasyna qatysty narazylyǵyn bildirdi. Qazaq ultshyldyǵyna qatysty oiyn ortaǵa saldy.
"Qazaq ultshyldyǵy bireýdiń basyn jaryp, kózin shyǵardy ma? Qazaq ultshyldyǵynyń qurbany bolǵan kimdi estidińiz? Qazaq ultshyldyǵy kimniń asyna ortaqtasty? Kimniń ishki isine kilikti? Qazaqstandaǵy tatýlyq pen turaqtylyqtyń shaiqalmai otyrǵany da qazaqtyń kónbistigi men tózimdiliginiń arqasy árbirden soń..." dep málimdegen edi budan buryn Arman Shoraev.
Sonymen qatar "Samuryq Qazynany" taratýǵa qatysty úndeý jasap, Qazaqstannyń bailyǵy bir adamnyń qolynda shoǵyrlanǵanyn syn sadaǵyna aldy.
"Úkimet shirigen bailarǵa salynatyn salyqty ondaǵan ese ulǵaityp, turmysy tómen azamattardyń salyǵyn meilinshe azaitýy qajet. Onyń ishinde ózin-ózin jumyspen qamtyǵandar, kóp balaly otbasylar kirýi tiis" degen bolatyn Shoraev exclusive.kz saityna bergen suhbatynda.
Arman Shoraev - Toqaevtyń bastamasymen qurylǵan Ulttyq qoǵamdyq keńestiń eks-múshesi
2006 jyly - "Habar" agenttigi bas direktordyń orynbasary boldy.
2006-2007 jyldary Prezident ákimshiliginde áleýmettik-saiasi bólimniń bas mamany qyzmetin atqardy.
2007-2014 jyldary KTK telearnasyn basqardy.
