ۇلتتىق بانك تەڭگە باعامىنا رۋبل ديناميكاسى مەن قور بيرجاسىنداعى ساۋدا-ساتتىقتا بەلسەندىلىكتىڭ تومەن بولۋى ازداپ قىسىم جاساعانىن ايتادى. الايدا رەتتەۋشى ورگان تەڭگەگە شاققاندا اقش دوللارى باعامىن ايقىنداۋدا رۋبل باعامىنداعى قۇبىلمالىلىق نەگە نەگىزگە الىنباۋ كەرەكتىگىن دە ءتۇسىندىرىپ ءوتتى، دەپ جازادى Dalanews.kz.
"2025 جىلعى 5 قاڭتاردا قور بيرجاسىنداعى ساۋدا-ساتتىقتا تەڭگەگە شاققاندا 1 اقش دوللارى 525،00 تەڭگە دەڭگەيىندە اشىلىپ، 525،00-528،00 تەڭگە ارالىعىندا ساۋدالاندى. كەشەگى ساۋدا-ساتتىق قورىتىندىسى بويىنشا 1 اقش دوللارىنىڭ ورتاشا سارالانعان باعامى 526،30 تەڭگە دەڭگەيىندە قالىپتاسىپ، 0،2%-عا السىرەدى. حالىقارالىق قارجى نارىقتارى جابىق بولعاندىقتان، ساۋدا-ساتتىقتاعى بەلسەندىلىك تومەن بولىپ، ونىڭ كولەمى نەبارى 119،5 ملن اقش دوللارىن قۇرادى"، - دەيدى ق ر ۇلتتىق بانك ءتوراعاسىنىڭ ورىنباسارى ءاليا مولدابەكوۆا.
ماسەلەن، ونىڭ ايتۋى بويىنشا، 2024 جىلعى قاڭتاردا ساۋدا-ساتتىقتىڭ ورتاشا كۇندىك كولەمى 172 ملن دوللار بولعان ەدى، ال 2024 جىلعى جەلتوقساندا 254 ملن دوللارعا جەتتى.
"نارىق قاتىسۋشىلارىنىڭ سۇرانىسى نەگىزىنەن دەمالىس كۇندەرى جيناقتالعان دوللار بويىنشا قىسقا پوزيسيامەن قالىپتاستى. سىرتقى فاكتورلاردان – كۇشەيىپ تۇرعان اقش دوللارى دامۋشى ەلدەردەگى باسقا ۆاليۋتالار سەكىلدى تەڭگەگە دە قىسىم كورسەتىپ كەلەدى. اقش دوللارىنىڭ يندەكسى 108 تارماققا جەتتى – بۇل ەكى جىلداعى ماكسيمۋم. وسى جاعدايدىڭ ءوزى ينۆەستورلار تاراپىنان امەريكالىق ۆاليۋتاعا قىزىعۋشىلىق ارتقانىن كورسەتەدى، ال ول بۇكىل الەمدەگى ۇلتتىق ۆاليۋتالاردىڭ پوزيسياسىنا تەرىس اسەر ەتەدى."، - دەيدى ول.
تاعى ءبىر فاكتور – رەسەي ءرۋبلىنىڭ ديناميكاسى. وعان نارىق قاتىسۋشىلارى قازاقستاننىڭ ساۋدا اينالىمىنداعى رەسەيدىڭ ماڭىزدى رولىنە بايلانىستى نازار اۋدارۋعا داعدىلانعان. الايدا، مولدابەكوۆا ۇزاققا سوزىلاتىن مەرەكەلىك دەمالىس كەزەڭىندە رەسەي ءرۋبلىنىڭ اقش دوللارىنا قاتىستى باعامى تومەن وتىمدىلىكپەن بۇرمالانۋى مۇمكىن ەكەنىن ەسكەرۋ قاجەت. مۇنداي كەزەڭدەردە قۇبىلمالىلىق ارتۋى مۇمكىن ەكەنىن ەسكەرتەدى.
ماسەلەن، 2025 جىلعى 3 قاڭتارداعى جاعداي بويىنشا باعام 1 اقش دوللارى ءۇشىن 110،6 رۋبلگە دەيىن السىرەدى.
"سونىمەن قاتار، تەڭگەگە قاراعاندا، رۋبلگە ايرىقشا، سونىڭ ىشىندە سانكسيالىق سيپاتتاعى فاكتورلار اسەر ەتەدى. مەنىڭ ويىمشا، قازىرگى جاعدايداعى رەسەي ءرۋبلىنىڭ ديناميكاسى باعدار بولماۋعا ءتيىس جانە ول نارىقتىڭ شامادان تىس رەاكسياسىنا ىقپال ەتۋى مۇمكىن. ال بۇل جەرگىلىكتى نارىقتا باعامنىڭ قالىپتاسۋىن بۇرمالاپ، ارتىق قۇبىلمالىلىققا اكەلەدى. قازىرگى ۋاقىتتا ءبىزدىڭ ەلدەرىمىزدىڭ نارىقتارى ءارتۇرلى جاعدايدا جۇمىس ىستەيتىنى انىق. سوندىقتان وسى جاعدايلاردا رەسەي ءرۋبلىنىڭ اقش دوللارىنا قاتىستى كۇرت اۋىتقۋى تەڭگە/دوللار ايىرباستاۋ باعامىندا كورىنبەۋى كەرەك، ويتكەنى ول ىرگەلى ەكونوميكالىق شىندىققا سايكەس كەلمەيدى"، - دەيدى ول.
ايتا كەتەيىك، 6 قاڭتارداعى ساۋدا-ساتتىق قورىتىندىسى بويىنشا 1 اقش دوللارى تاعى دا 1 تەڭگەگە ءوسىپ، 527،30 تەڭگە بولدى. ال قاڭتاردا 1 اقش دوللارىنىڭ رەسمي قۇنى 525،11 تەڭگە بولعان ەدى. سوندا سوڭعى ەكى كۇندە دوللاردىڭ رەسمي باعامىنا 2 تەڭگە قوسىلدى.
