ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا، جۇج جوباسى كەلەسى باعىتتار بويىنشا 109 ءىس-شارانى ورىنداۋدى قاراستىرادى: جاڭا كونوميكالىق ساياسات، ناقتى سەكتوردى دامىتۋ، ەل بولاشاعىنا ستراتەگيالىق ينۆەستيسيالار، مەملەكەتتىك باسقارۋدى قايتا جۇكتەۋ، زاڭ جانە ءتارتىپ.
ماسەلەن، «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە قوسۋ جانە جالپى مەديسينالىق ينفراقۇرىلىمدى كەشەندى جاقسارتۋ بويىنشا شارالار ازىرلەۋ جوسپارلانىپ وتىر. جاڭا «جايلى مەكتەپ» ۇلتتىق جوباسى اياسىندا 2025 جىلعا دەيىن 800 مىڭ وقۋشىعا ارنالعان مەكتەپتەر سالىنادى.
بۇدان باسقا، ايەلدەردىڭ زەينەتكەرلىك جاسىن 2028 جىلعا دەيىن جوعارىلاتۋعا (61 جاستى بەلگىلەي وتىرىپ) موراتوريي ەنگىزۋ جانە 2023 جىلعى 1 قاڭتاردان باستاپ بالا كۇتىمى بويىنشا تولەمدەر بەرۋ ۇزاقتىعىن 1،5 جاسقا دەيىن ۇلعايتۋ جونىندەگى زاڭنامالىق تۇزەتۋلەر قابىلداناتىن بولادى.
2024 جىلدىڭ 1 قاڭتارىنان باستاپ «ۇلتتىق قور – بالالارعا» جوباسى ىسكە قوسىلادى دەپ كۇتىلەدى، ونىڭ اياسىندا بالالاردىڭ ارنايى جيناقتاۋشى شوتتارىنا ۇلتتىق قوردىڭ جىل سايىنعى ينۆەستيسيالىق كىرىسىنىڭ 50%-ىن باعىتتاۋ جوسپارلانىپ وتىر. بۇل قاراجاتتى 18 جاسقا تولعاندا تۇرعىن ءۇي ساتىپ الۋعا جانە ءبىلىم الۋعا پايدالانۋعا بولادى.
سونىمەن قاتار ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ ساپاسىن ارتتىرۋ ءۇشىن «مەملەكەتتىك ساتىپ الۋ تۋرالى» زاڭدى جاڭارتۋ، «سامۇرىق-قازىنا» قورىنىڭ قىزمەتىن قايتا فورماتتاۋ، سونداي-اق اەا، اگروونەركاسىپ كەشەنى مەن سۋ سالاسى قىزمەتىنىڭ تيىمدىلىگىن ارتتىرۋ ءۇشىن شارالار قابىلداۋ جوسپاردا بار.
وعان قوسا، جاڭا سالىق، بيۋدجەت جانە قالا قۇرىلىسى كودەكستەرى ازىرلەنەتىن بولادى.
پرەمەر-مينيستر جولداۋدى ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسىندا مەملەكەت باسشىسى ايقىنداعان مىندەتتەردىڭ بارلىعى قامتىلعانىن اتاپ ءوتتى. ول حالىق پەن بيزنەستىڭ وزەكتى پروبلەمالارىن شەشۋگە باعىتتالعان.
جوسپار باعانى رەتتەۋ، سالىقتىق جانە كەدەندىك اكىمشىلەندىرۋ، بيۋدجەت پروسەستەرىن جەڭىلدەتۋ، كاسىپكەرلىكتى قولداۋ، اۆتوموبيل جولدارىن سالۋ، زاڭ ۇستەمدىگى مەن سوت تورەلىگىن قامتاماسىز ەتۋ، قوعامدىق قاۋىپسىزدىكتى كۇشەيتۋ سياقتى سالالاردى قوزعايدى.
«جوسپاردىڭ ماڭىزدى بولىگى الەۋمەتتىك دامۋ، دەنساۋلىق ساقتاۋ جانە ءبىلىم بەرۋ بويىنشا كەشەندى ءارى جۇيەلى شارالاردى قامتاماسىز ەتۋگە باعىتتالعان. جالپى ونى ىسكە اسىرۋ ەكونوميكانى ساپالى دامىتۋعا جانە حالىقتىڭ ءال-اۋقاتىن ارتتىرۋعا مۇمكىندىك بەرەدى» دەدى ءاليحان سمايىلوۆ.
تالقىلاۋ قورىتىندىسى بويىنشا ۇكىمەت ۇسىنىلعان قۇجات جوباسىن ماقۇلدادى.
پرەمەر-مينيستر بارلىق مەملەكەتتىك ورگاندار مەن اكىمدىكتەرگە جالپىۇلتتىق جوسپاردى ورىنداۋعا شۇعىل كىرىسۋدى تاپسىردى.
