تۇركىستان وبلىسىنىڭ اكىمى دارحان ساتىبالدىنىڭ ءتيىستى كومەكتى ۇيلەستىرۋ جونىندە تاپسىرماسىنا سايكەس
وبلىستىق پارتيا فيليالىنىڭ اتقارۋشى حاتشىسى بەيسەن تاجىبايەۆ ەل اماناتىن شىعارىپ سالۋ شاراسىنا قاتىسىپ، اتالعان باعىتتاعى جۇمىستار جايىندا باياندادى.
– قوستانايداعى توتەنشە جاعداي مەملەكەت باسشىسى قاسىم-جومارت توقايەۆتىڭ تىكەلەي باقىلاۋىندا. پارتيا ءتوراعاسى ەرلان قوشانوۆ فيليالدارعا تاپسىرما جۇكتەپ جەدەل ارەكەتكە كوشتى. وبلىستىق پارتيا فيليالى جانىنان اشىلعان قابىلداۋ پۋنكتى 4 قىركۇيەكتەن باستاپ گۋمانيتارلىق كومەكتەر قابىلداۋدا. العاشقى كۇننىڭ وزىندە قالالىق ءماسليحات دەپۋتاتتارى، جەرگىلىكتى جومارت ازاماتتار ەڭ قاجەتتى جانە جولعا جارامدى زاتتارمەن قامتىپ ۇلگەردى.
بىرنەشە جىل بۇرىن وڭىرىمىزدە ورىن العان توتەنشە جاعدايدا ەل بىرلىگى مەن ناقتى كومەكتەردى كوردىك. جاقسىلىققا ەكى ەسە جاقسىلىقپەن قايىرۋعا تىرىساتىن حالىقپىز. ءبىر تاۋلىكتىڭ ىشىندە ماقتاارال اۋدانى، ارىس جانە تۇركىستان قالالارىنان جالپى 4 جۇك كولىك گۋمانيتارلىق كومەك جينالىپ، قوستانايعا جولعا شىقتى. وسى ىستەرگە اتسالىسقان ازاماتتارعا شىنايى العىسىمدى بىلدىرەمىن. توتەنشە جاعداي تۇراقتالعانعا دەيىن گۋمانيتارلىق كومەكتەردى ۇيىمداستىرۋدى جالعاستىرامىز جانە بارشا تۇركىستاندىقتاردى يگى باستامانى قولداۋعا شاقىرامىن، – دەدى بەيسەن داۋلەت ۇلى.
وڭىردەگى «جاستار رەسۋرستىق ورتالىقتارىنىڭ» ۇيىمداستىرۋىمەن جەكە كاسىپكەرلەر مەن قاراپايىم ازاماتتاردىڭ، شاعىن بيزنەس وكىلدەرىنىڭ دەمەۋشىلىگىمەن جينالعان قاجەتتى زاتتار ىشىندە 3،4 توننا ۇن، 1500 كەلىگە جۋىق ماكارون ونىمدەرى، 70 قاپ كارتوپ، 500 كەلىگە جۋىق كۇرىش، 1000 ليتردەن اسا پىستە ماي، 900 كونسەرۆىلەنگەن بانكا جانە وزگە دە ازىق-تۇلىك پەن تۇرمىسقا قاجەتتى زاتتار جولعا شىقتى.
«AMANAT» پارتياسى ماقتاارال اۋداندىق فيليالى مەن جەرگىلىكتى اكىمدىك، جۇرتشىلىق بىرلەسىپ 1 جۇك كولىگىن جونەلتسە، ارىس قالالىق فيليالى مەن قالالىق اكىمدىك، جومارت جاندار تاراپىنان 2 جۇك كولىگىنە كومەككە قاجەتتى زاتتار تيەلدى. ال وبلىس ورتالىعى تۇركىستان قالاسىنداعى 1 جۇك كولىگى ءبىرىنشى كەزەكتە پايدالانۋعا كەرەكتى قۇرال-جابدىقتارمەن قامتىلدى.
گۋمانيتارلىق كومەككە ءبىرقاتار مەكەمەلەر دە وزىندىك ۇلەسىن قوستى.
اتاپ ايتقاندا، ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى جانار تەمىربەكوۆا باستاعان قولداۋ توبى 400 دانا كورپە-توسەك جەتكىزدى. سونداي-اق 500 ءمۇعالىم 1 كۇندىك جالاقىلارىن «Biz birgemiz» قورىنا اۋداردى. تۇركىستان وبلىستىق قازاقستان حالقى اسسامبلەياسى مۇشەلەرى دە كيىم-كەشەك، ازىق-تۇلىك تاۋارلارى جانە جەكە قولدانىسقا قاجەتتى زاتتارمەن تولىقتىردى.
اتالعان كومەكتى قوستاناي وبلىسىنا دەيىن جەتكىزۋ «جاستار رۋحى» جاستار قاناتى ايماقتىق فيليالىنىڭ بەلسەندىلەرىنە جۇكتەلدى. ءوڭىردىڭ 10 بەلسەندى جاسى اپاتتى قالپىنا كەلتىرۋ جۇمىستارىنا قاتىسىپ، زارداپ شەككەن تۇرعىندارعا كومەك كورسەتەدى.
https://dalanews.kz/news/81133-olar-saiasi-keleshegine-alangdauly-mam
