19 ماۋسىمدا ق ر پرەزيدەنتى نۇرسۇلتان نازاربايەۆ تاريحي جارلىققا قول قويدى، وعان سايكەس وڭتۇستىك قازاقستان وبلىسى تۇركىستان وبلىسى رەتىندە قايتا اتالدى، ال تۇركىستان — وبلىس ورتالىعى بولىپ بەكىتىلدى. وبلىس باسشىلىعى ەكى اي ىشىندە اكىمشىلىك ورتالىقتى كوشىرۋ بويىنشا بەلسەندى جۇمىستار اتقارىپ جاتىر.
جۇمىس ساپارى بارىسىندا پرەمەر-مينيستر باقىتجان ساعىنتايەۆ بۇگىنگى تاڭدا مەملەكەتتىك ورگاندار ورنالاسقان ءبىرقاتار نىساندى ارالادى. سونداي-اق، تۇركىستانعا مەملەكەتتىك ورگانداردى كوشىرۋ جانە شىمكەنت قالاسىن دامىتۋ ماسەلەلەرى جونىندە كەڭەستەر وتكىزۋ جوسپارلانعان.
باقىتجان ساعىنتايەۆ جۇمىس ساپارىن تۇركىستان قالاسىنان باستادى. مۇندا اكىمشىلىك عيماراتتاردىڭ قۇرىلىسى سالىنۋ ۋاقىتىندا (2020 ج. دەيىن) مەملەكەتتىك ورگاندار ورنالاساتىن كوممۋنالدىق مەنشىك جانە كوممەرسيالىق نىسان عيماراتتارىنا باردى.
ارالاۋ بارىسىندا پرەمەر-مينيسترگە ورىن اۋىستىرۋ جۇمىستارى بەكىتىلگەن جوسپارعا سايكەس جۇرگىزىلىپ جاتقانى باياندالدى — 27 جەرگىلىكتى اتقارۋشى ورگاننىڭ 22 باسقارماسى اۋىستى، سونىمەن قاتار 14 اۋماقتىق ورگان وكىلدەرى بۇگىندە تۇركىستاندا قىزمەت كورسەتۋدە. كەلەسى جىلى بارلىق ۆەدومستۆولاردى كوشىرۋ جۇمىستارىن اياقتاۋ جوسپارلانعان: وبلىس اكىمدىگى، 24 سالالىق باسقارما، ءماسليحات اپپاراتى، تەكسەرۋ كوميسسياسى. بۇدان وزگە، توعىز بيۋدجەتتىك ۇيىم كوشىرىلەدى. ءبىرىنشى كەزەڭدە 842 ادام اۋىسادى، قالادا ولار ورنالاساتىن عيماراتتار انىقتالعان، قاجەتتى كوممۋنيكاسيامەن قامتاماسىز ەتۋ جۇمىستارى جۇرگىزىلىپ جاتىر. تۇرعىن ءۇيى جوق مەملەكەتتىك قىزمەتكەرلەرگە جاتاقحانالاردان ورىندار دايىندالعان.
تۇركىستان وبلىسىنىڭ وڭتۇستىك قازاق وبلىسى اتاۋىمەن 10.03.1932 جىلى نەگىزى قالاندى، كەيىن 1936 جىلى اتاۋى وڭتۇستىك قازاقستان وبلىسى دەپ وزگەرتىلدى. 03.05.1962 جىلدان باستاپ 06.06.1992 جىل ارالىعىندا شىمكەنت وبلىسى دەپ اتالدى، 1992 جىلى بۇرىنعى اتاۋى بەرىلىپ، وڭتۇستىك قازاقستان وبلىسى دەپ قايتا اتالدى. 19.06.2018 جىلى پرەزيدەنت جارلىعىمەن وبلىس تۇركىستان وبلىسى دەپ اتالىپ، اكىمشىلىك ورتالىعى تۇركىستان قالاسىنا اۋىستىرىلدى؛ شىمكەنتكە رەسپۋبليكالىق ماڭىزداعى قالا مارتەبەسى بەرىلگەننەن كەيىن وبلىستار قۇرامىنان شىعارىلدى. وبلىس اۋدانى 116 280 كم² (ەل اۋماعىنىڭ 4،3%). سولتۇستىك جانە وڭتۇستىك ۋچاسكەلەرى اراسىنداعى الشاقتىق — 600 شاقىرىم.
وبلىستىڭ ونەركاسىپ ونىمدەرى ءوندىرىسىنىڭ كولەمى قاڭتار–شىلدە ايلارىندا 250،7 ملرد تەڭگەنى قۇرادى. نەگىزگى كاپيتالعا سالىنعان ينۆەستيسيالار — 118،5 ملرد تەڭگە، بۇل 2017 جىلعى ءتيىستى كەزەڭگە قاراعاندا 5،1% ارتىق.
مەكتەپ-ينتەرنات عيماراتىندا 10 اۋماقتىق ورگان ورنالاسقان، بۇل — «دەپارتامەنتتەر ءۇيى». سونىمەن قاتار، وبلىس اكىمىنىڭ ءبىرىنشى ورىنباسارى ق. نۇكەنوۆ وڭىردە ءبىلىم بەرۋ جۇيەسىنىڭ ينفراقۇرىلىمىن دامىتۋ جونىندەگى شارالار كەشەنى ىسكە اسىرىلىپ جاتقانىن جەتكىزدى. بيىل رەسپۋبليكالىق بيۋدجەت ەسەبىنەن 4،4 ملرد تەڭگە سوماسىنا 16 ءبىلىم بەرۋ نىسانىنىڭ قۇرىلىسىن جۇرگىزۋ، سونداي-اق، جاتاقحانالار قۇرىلىسى مەن مەملەكەتتىك-جەكەمەنشىك ارىپتەستىك ەسەبىنەن كوللەدجدەردى جاراقتاندىرۋ شارالارى قاراستىرىلعان.
بۇدان وزگە، سەگىز جەرگىلىكتى اتقارۋشى ورگاندار كوشىرىلگەن بۇرىنعى «ءامينا» كلينيكاسىنىڭ عيماراتتارى جانە بەس مەملەكەتتىك ورگانعا ارنالعان «ۆەرسال» ويىن-ساۋىق كەشەنى تەكسەرىلدى. مۇمكىندىكتى پايدالانا وتىرىپ، تۇركىستان وبلىسى اكىمىنىڭ ورىنباسارى ە. سادىر وڭىردە بارلىعى 96 ەمدەۋ جانە 263 امبۋلاتورلىق-ەمحانالىق ۇيىمدارى مەديسينالىق كومەك كورسەتەتىنىن ايتتى. سونداي-اق، جاڭا دەنساۋلىق ساقتاۋ نىساندارىن سالۋ جۇمىستارى جۇرگىزىلىپ جاتىر: «100 مەكتەپ، 100 اۋرۋحانا» جوباسى بويىنشا ءۇش نىسان دايىن، «350 دارىگەر امبۋلاتورياسى، فەلدشەرلىك-اكۋشەرلىك پۋنكتىلەر جانە ەمحانالار» جوباسى بويىنشا 4،8 ملرد تگ سوماسىنا 57 نىسان سالىندى.
باقىتجان ساعىنتايەۆ تاريحي-مادەني ەتنوگرافيالىق ورتالىقتى تەكسەرۋ بارىسىندا تۇركىستان وبلىسى ءماسليحاتى مەن اكىمىنىڭ اپپاراتىن ورنالاستىرۋ جاعدايىمەن تانىستى. ايتا كەتۋ كەرەك، بۇگىندە وڭىردە 688 مادەنيەت جانە ونەر مەكەمەسى بار. ونىڭ – 390 كىتاپحانا، 249 مادەنيەت ءۇيى، 25 مۋزەي.
وبلىستىق مۋزەيدە قالانى دامىتۋدىڭ باس جوسپارىنىڭ تۇجىرىمداماسى جوباسىنىڭ تانىستىرىلىمى ءوتتى. ق ر پرەزيدەنتىنىڭ جارلىعىنا سايكەس تۇركىستاندى تۇركى الەمىنىڭ مادەني-رۋحاني ورتالىعى رەتىندە دامىتۋدىڭ ۇزدىك تۇجىرىمداماسىنا اشىق حالىقارالىق بايقاۋ جاريالاندى. بايقاۋدى ۇيىمداستىرۋ مەن وتكىزۋ ماقساتىندا ۇكىمەتتىك كوميسسيا قۇرىلىپ، جۇمىس ىستەپ جاتىر. 11 شىلدەدەن باستاپ 11 تامىزعا دەيىن بايقاۋعا تۇركيانىڭ، وڭتۇستىك كورەيانىڭ، وزبەكستاننىڭ قالا قۇرىلىسشىلارى مەن 35 وتاندىق، 7 شەتەلدىك ساۋلەتشىلەر قاتىستى. ۇسىنىلعان جوبالار كورمەسى تۇركىستاندا 17–20 تامىز ارالىعىندا وتۋدە. وسى كەزەڭدە كوميسسيا مۇشەلەرى باس جوسپاردىڭ ەڭ ۇزدىك تۇجىرىمداماسىن انىقتاۋى ءتيىس.
ەسكە سالا كەتەيىك، ب. ساعىنتايەۆ مەملەكەت باسشىسىنىڭ تاپسىرماسى بويىنشا ەل وڭىرلەرىن جۇمىس ساپارىمەن ارالاپ ءجۇر. بۇعان دەيىن اتىراۋ، قاراعاندى، قوستاناي، قىزىلوردا، ماڭعىستاۋ، وڭتۇستىك قازاقستان، اقمولا، اقتوبە، باتىس قازاقستان وبلىستارىنا جۇمىس ساپارىمەن باردى.
ق ر پرەمەر-مينيسترىنىڭ باسپا ءسوز قىزمەتى
