2025 جىلعى نەگىزگى ۇبت-عا وتىنىشتەردى قابىلداۋ 12 ساۋىردە باستالىپ، 25 ساۋىرگە دەيىن جالعاسادى، دەپ حابارلايدى Dalanews.kz
ءوتىنىش بەرۋ كەزەڭى ەكى كەزەڭگە بولىنەدى:
- 12-18 ءساۋىر ارالىعىندا ءبىر رەت ءوتىنىش بەرۋگە؛
- 19-25 ءساۋىر ارالىعىندا ءبىر نەمەسە ەكى رەت ءوتىنىش بەرۋگە بولادى.
ال تەستىلەۋ 16 مامىردا باستالىپ، 5 شىلدەگە دەيىن جالعاسادى. تالاپكەرلەر نەگىزگى ۇبت-نى ەكى رەت تاپسىرىپ، ەڭ ۇزدىك ناتيجەمەن گرانت كونكۋرسىنا قاتىسا الادى.
ءوتىنىشتى قايدا تاپسىرۋ كەرەك؟
ۇبت-عا قاتىسۋ ءۇشىن ۇلتتىق تەستىلەۋ ورتالىعىنىڭ http://app.testcenter.kz سايتى نەمەسە UTO.kz قوسىمشاسى ارقىلى ءوتىنىش بەرۋگە بولادى. تالاپكەرلەر تەستىلەۋ كۇنىن، ۋاقىتىن جانە پۋنكتىن وزدەرى تاڭدايدى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناسياسىن بەلگىلەيدى.
تالاپكەرلەردىڭ نەگىزگى ۇبت-عا دايىندىعىن جاقسارتۋ ماقساتىندا ەنگىزىلگەن ءار ءپان بويىنشا جەكە تاقىرىپتىق تالداۋ بار. ياعني ءار ۇبت-دان كەيىن (قاڭتار، ناۋرىز) تۇلەكتەرگە جەكە تاقىرىپتىق تالداۋ بويىنشا بىلىمدەرىن ارتتىرۋ ۇسىنىلادى. سونىمەن قاتار ءبىرىنشى مۇمكىندىكتى تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى. ودان بولەك ونلاين بايقاۋ سىناقتارى ىسكە قوسىلعان. وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان وقۋلىقتار ءتىزىمى مەن تەست جوسپارى؛ «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى؛ «ينفورماتيكا» پانىنەن تەرميندەر ءتىزىمى؛ «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى.
ۇبت-دا قانشا تاپسىرما بەرىلەدى؟
ۇبت-داعى پاندەردىڭ سانى وزگەرىسسىز قالادى، ياعني ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما، «وقۋ ساۋاتتىلىعىنان» 10 تاپسىرما، «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140.
ۇبت قانشا ۋاقىتقا سوزىلادى؟
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
اكادەميالىق ادالدىقتى قامتاماسىز ەتۋ ماقساتىندا ۇبت-عا قاتىسۋشى ءار ادام جەكە جاسالعان تەست نۇسقاسىن الادى. ەمتيحان كەزىندە تەستىلەۋ باعدارلاماسىندا كالكۋلياتور، حيميالىق ەلەمەنتتەردىڭ پەريودتىق جۇيەسى جانە تۇزداردىڭ ەرىگىشتىك كەستەسى قولجەتىمدى بولادى. سونىمەن قاتار تالاپكەرلەرگە ىڭعايلى بولۋ ءۇشىن كەستەلەردىڭ قاعاز نۇسقالارى دا بەرىلەدى.
اپەللياسيانى تەستىلەۋ اياقتالعاننان كەيىن 30 مينۋت ىشىندە بەرۋگە بولادى. سەرتيفيكات اپەللياسيا قارالعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
وقۋعا ءتۇسۋ ءۇشىن شەكتى بالل قانداي؟
شەكتى بالدار وزگەرىسسىز قالدى: «قۇقىق» جانە «پەداگوگيكالىق عىلىمدار» باعىتتارىنا ءتۇسۋ ءۇشىن كەمىندە 75 بالل، «دەنساۋلىق ساقتاۋ جانە الەۋمەتتىك قامتاماسىز ەتۋ (مەديسينا)» ءۇشىن كەمىندە 70 بالل جيناۋ قاجەت؛ ۇلتتىق جوو-نا ءتۇسۋ ءۇشىن كەمىندە 65 بالل، باسقا جوو-نا ءتۇسۋ ءۇشىن كەمىندە 50 بالل جيناۋ قاجەت.
ەسكە سالايىق، 2025 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە باسقا دا ەرەجەلەردى بۇزۋ فاكتىلەرى انىقتالعان جاعدايدا، تالاپكەردىڭ ۇبت ناتيجەلەرى جويىلادى.
