مەملەكەت باسشىسى قاسىم-جومارت توقايەۆ حالىققا ارناعان جولداۋىندا ەلىمىزدە بالىق شارۋاشىلىعىن دامىتۋدىڭ ماڭىزدىلىعىنا توقتالىپ، ۇكىمەتكە ناقتى تاپسىرما جۇكتەگەن ەدى.
پرەزيدەنت تاپسىرماسىنا سايكەس، سالانى دامىتۋدىڭ 2021-2030 جىلعا ارنالعان باعدارلاماسى قابىلدانىپ، جۇزەگە اسىرىلا باستادى.
باعدارلاما شەڭبەرىندە 2030 جىلى ەلىمىزدە بالىق ءوسىرۋ كولەمىن 270 مىڭ تونناعا جەتكىزۋ جوسپارلانعان.
بۇل ورايدا، تۇركىستان وبلىسىندا 20 مىڭ تونناعا جەتكىزۋ مەجەسى تۇر. جالپى 2022 جىلى وڭىردە 6199،85 توننا تاۋارلى بالىق وندىرىلگەن. بيىل 6640 توننا تاۋارلى بالىق ءوندىرۋ كوزدەلىپ وتىر. بۇگىندە اتالعان جوسپاردى ورىنداۋ باعىتىندا ناقتى جۇمىستار جۇرگىزىلىپ جاتىر.
بريفينگ بارىسىندا مەكەمە باسشىسى اباي قىپشاقبايەۆ وڭىرىمىزدە بالىق ءوسىرۋ شارۋاشىلىعى قارقىندى دامىپ كەلە جاتقانىن تىلگە تيەك ەتىپ، بۇل باعىتتا كاسىپكەرلەرگە كومەك بەرەتىن مەكتەپتىڭ ناتيجەلى جۇمىستارىمەن تانىستىردى.
سپيكەردىڭ ايتۋىنشا، تۇركىستان وبلىسىندا بالىق ءوسىرۋ، اكۆاوسىرۋ سالاسىن دامىتۋ ماقساتىندا العاش رەت «شاردارا بالىق مەكتەبى» ءجشس-ى 2022 جىلى ءوز جۇمىسىن باستاعان. بۇگىندە مەكتەپ كاسىپكەرلەردى 70 پايىز تاجىريبەلىك، 30 پايىز جوعارى دارەجەلى مامانداردىڭ تەوريالىق ساباقتارىمەن ۇشتاستىرىپ، وقىتىپ جاتىر.
سونداي-اق، مەكتەپتىڭ وقىتۋ كۋرسىنا قاتىسۋشىلاردىڭ 50 پايىزى وزگە وڭىرلەردەن كەلگەن. اتاپ ايتساق، تۇركىستان وبلىسىنان بولەك، الماتى، اقتاۋ، اتىراۋ، كوكشەتاۋ، تاراز جانە اقتوبە ت.ب. قالالاردان كەلەتىن كاسىپكەرلەر بار. بۇگىندە ولار شارۋاشىلىقتارىن دامىتۋ ءۇشىن قاجەتتى ءبىلىم الىپ، كاسىپتەرىن جانداندىرعان.
– شاردارا اۋدانىندا 20 جىلدان بەرى بالىقتى وڭدەپ، ەكسپورتتاۋمەن اينالىسىپ كەلە جاتقان «حاميت» اۋىل شارۋاشىلىعى وندىرىستىك كووپەراتيۆى بار. وسى مەكەمەنىڭ قاسىنان بالىق شارۋاشىلىعىن دامىتۋ ماقساتىندا وقىتۋ كۋرسىن قولعا الدىق. باستى ماقساتىمىز – حالىقتى ساپالى ونىممەن قامتىپ، شارۋاشىلىقتى ونەركاسىپتىك دەڭگەيگە كوتەرۋ، ەكونوميكالىق تۇرعىدان تارتىمدى ەتۋ.
«بالىققا دا باپ كەرەك» دەمەكشى، بۇل جەردە كەز كەلگەن بالىق وسىرۋمەن اينالىسقىسى كەلەتىن ازامات تاجىريبە الماسىپ، بىزبەن سەرىكتەس بولا الادى، – دەدى اباي باحىتجان ۇلى.
سونداي-اق، مۇندا بالىقتى قولدان جانە جاساندى تۇردە وسىرۋگە مۇمكىندىك بار. ودان بولەك، كاسىپكەرلەرگە بالىقتى دەرناسىلدەن باستاپ تاۋارلى بالىق كولەمىنە دەيىن ءوسىرۋدىڭ قىر-سىرىن، ءارى قاراي بالىق وسىرۋگە ناقتى قىزىعۋشىلىق تانىتقان بيزنەس وكىلدەرىنە توعان قازۋ، شارباق ورناتۋ، باسسەين قۇرۋ جانە ول جەرگە شاباقتاردى جىبەرۋ جايى ۇيرەتىلەدى.
مەكتەپ بۇگىنگە دەيىن 50 وقۋشىدان تۇراتىن 6 لەكتى وقىتقان. ونىڭ ىشىندە، 15 بيزنەس وكىلى قىزىعۋشىلىق تانىتىپ، بالىق ءوسىرۋ كاسىبىن اشقان. ولار قازىرگى تاڭدا مەكتەپپەن تۇراقتى بايلانىس ورناتىپ، كاسىپتەرىن دامىتىپ وتىر.
ءبىر اپتاعا ارنالعان وقىتۋ كۋرسىنىڭ اقىسى – 200 مىڭ تەڭگە. وقۋ كۋرسى، جاتىن ورنى مەن تاماعى وسى مەكتەپ تاراپىنان قامتاماسىز ەتىلەدى.
بريفينگتە بەلگىلى بولعانداي، بالىق شارۋاشىلىعىمەن اينالىساتىن شارۋالارعا مەملەكەت تاراپىنان قولداۋ كوپ. ماسەلەن، بالىققا بەرىلەتىن جەمنىڭ 30 پايىزى مەملەكەت ەسەبىنەن سۋبسيديالانادى. سونىمەن قاتار، تاۋارلى بالىق ءوسىرۋشى شارۋاشىلىقتارعا ارنالعان تەحنيكا مەن جابدىق ساتىپ الۋعا دا قوماقتى قولداۋ بار.
