ءماجىلىس دەپۋتاتى ەرلان سايىروۆ قازاقستان بۇگىندە تەكتونيكالىق ساياسي وزگەرىستەر كەزەڭىن وتكەرىپ جاتقانىن ايتتى، - دەپ حابارلايدى Dalanews.kz.
ونىڭ سوزىنشە، بۇگىنگى ساياسي پروسەستەردى ساراپتاۋ ءۇشىن كەشەگى تاريحقا كوز جۇگىرتۋ اسا ماڭىزدى. سايىروۆ ەسكى جۇيەدە بيلىك سول كەزدەگى پرەزيدەنتتىڭ قولىنا شوعىرلاندى دەپ تە سىنادى.
"1990 جىلداردىڭ باسىندا ەلىمىزدە ناقتى پليۋراليزم مەن دەموكراتياعا باعىتتالعان ءىس-قادامدار بولدى. پارلامەنت پەن اتقارۋشى بيلىك اراسىندا تەپە-تەڭدىك بولىپ، كونستيتۋسيالىق قۇرىلىستى باقىلاپ وتىراتىن ينستيتۋتتار جۇيەلى جۇمىس اتقاردى.
1995 جىلعى كونستيتۋسيا ەكونوميكالىق رەفورمالار مەن الەۋمەتتىك تۇراقتىلىقتى جەدەلدەتكەنىمەن، ساياسي جۇيەمىز جەكەلەگەن توپتار مەن كەيبىر تۇلعالاردىڭ مۇددەسىنە جۇمىس جاساپ كەتتى. ءسويتىپ بيلىك تولىقتاي سول كەزدەگى پرەزيدەنتتىڭ قولىندا شوعىرلانىپ، پارلامەنت فورمالدى ءرول اتقاردى"، - دەدى ول.
دەپۋتاتتىڭ ايتۋىنشا، وسىلايشا ازاماتتار مەن بيلىك اراسىندا بايلانىس ءۇزىلىپ، قوعامدىق پروسەسستەر ءبىر باعىتتا عانا جۇرگەن.
"2010 جىلدان باستاپ قازاقستاندا ساياسي داعدارىس اشىق تۇردە ءورشىدى. ماسەلەن، جەر رەفورماسىنا قارسىلىق جانە حالىقتىڭ الەۋمەتتىك جاعدايىنىڭ تومەندەۋىنە نارازىلىق رەتىندە كەيبىر الەۋمەتتىك توپتار باس كوتەردى"، - دەدى سايىروۆ.
ءماجىلىس دەپۋتاتى توقايەۆتىڭ بيلىككە كەلۋىنە قاتىستى دا پىكىر ءبىلدىردى.
"2019 جىلى وسىنداي كۇردەلى كەزەڭدە بيلىك باسىنا قاسىم-جومارت توقايەۆ كەلدى. ول بيلىككە كەلىسىمەن "قازاقستاندا ساياسي رەفورمالار جاساماي، ەلىمىزدىڭ تۇراقتى ەكونوميكالىق دامۋىن قامتاماسسىز ەتۋ مۇمكىن ەمەس"، – دەپ مالىمدەدى.
مەملەكەت باسشىسىنىڭ باستاماسىمەن ساياسي رەفورمالاردى جوسپارلاۋ ءۇشىن ارنايى ۇلتتىق كەڭەس قۇرىلدى. ۇلتتىق كەڭەس ەلدەگى ۋشىعىپ تۇرعان ساياسي پروسەستى ەۆوليۋسيالىق جولمەن شەشۋدى كوزدەپ، پرەزيدەنت وكىلەتتىلىگىن پارلامەنتكە بەرۋ، وپپوزيسيا ءرولىن ارتتىرۋ، كونستيتۋسياعا وزگەرىستەر ەنگىزۋ جانە بيلىك تارماقتارى اراسىنداعى تەپە-تەڭدىك ماسەلەلەرىن قاراستىردى.
پرەزيدەنتتىڭ كادەنسياسىنىڭ باستى ماسەلەسى – ەلىمىزدە قالىپتاسقان "جەكە باسقا تابىنۋشىلىق" پروسەسسىن جويىپ، مەملەكەت پەن قوعام اراسىنداعى جاڭا تۇرپاتتى، حالىقتىڭ قوعامدىق مۇددەسىنە سايكەس كەلەتىن ساياسي جۇيە قالىپتاستىرۋ"، - دەدى ول.
سايىروۆتىڭ سوزىنشە، بۇل رەفورمالارعا ەسكى جۇيە داۋىرىندە قازاقستاننىڭ ساياسي سفەراسىنا، ەكونوميكالىق جۇيەسىنە دەندەپ كىرىپ العان وليگارحيالىق، بيۋروكراتيالىق توپتار قارسى بولعان.
"مەملەكەتتىڭ ىشىندە ساياسي رەفورمالارعا قارسى پيعىل مەن ريەۆانشيستتىك توپتار پايدا بولدى. وسى ريەۆانشيستتەر 2019 جىلدان باستاپ جۇرگىزىلىپ جاتقان رەفورماتورلىق كۋرسقا جۇيەلى تۇردە قارسىلىق ءبىلدىرىپ كەلدى. بۇل قىلمىستىق توپتىڭ تىمىسكى ارەكەتتەرى قاڭتار وقيعاسىنداعى اۋىر جاعدايلارعا الىپ كەلدى.
قاڭتار كەزەڭىندە ەل پرەزيدەنتى قازاقستان مەملەكەتىن اۋىر الاپاتتان قۇتقارىپ قالدى! قاڭتار وقيعالارى ساياسي رەفورمالارعا جاڭا پارمەن بەردى. وسى جەردە باسا ايتاتىن ماسەلە، جوعارىدا ايتىلعانداي، ساياسي رەفورمالار 2019 جىلى باستالعان!" - دەدى دەپۋتات.
