«قازاقستان تەمىر جولى» ەنگىزىپ وتىرعان شەكتەۋلەر سالدارىنان وتاندىق فەرمەرلەر وزدەرىنىڭ ءداستۇرلى ەكسپورتتىق نارىقتارىنان ايىرىلىپ، ولاردىڭ ورنىن رەسەي مەن وزبەكستاننىڭ باسەكەلەستەرى باسىپ كەلەدى، دەپ حابارلايدى Dalanews.kz "DALA INSIDE"-قا سىلتەمە جاساپ.

كتج «سارىاعاش» حالىقارالىق وتكەلى ارقىلى جۇك قابىلداۋعا كونۆەنسيالىق تىيىم ەنگىزدى. بۇل وتكەل قازاقستاننىڭ ورتالىق ازيا ەلدەرىنە: وزبەكستان، قىرعىزستان، تاجىكستان، تۇرىكمەنستان جانە اۋعانستانعا باعىتتالعان استىق ەكسپورتىنىڭ نەگىزگى ارناسى. الايدا شەكتەۋ ترانزيتتىك تاسىمالدارعا قولدانىلمايدى. سونىڭ ناتيجەسىندە شەتەلدىك ەكسپورتتاۋشىلار قازاقستاندىق ءونىم وندىرۋشىلەر بوساتقان نارىقتاردى تەز ارادا يگەرىپ جاتىر.

سالا وكىلدەرىنىڭ ايتۋىنشا، كتج كەزەڭ-كەزەڭىمەن ەنگىزەتىن مۇنداي شەكتەۋلەر ۇن تارتۋ كاسىپورىندارىن جارتى قۋاتپەن جۇمىس ىستەۋگە ماجبۇرلەيدى. وندىرۋشىلەر تۇراقتى جانە الەۋەتتى تۇتىنۋشىلارىنان ايىرىلىپ، ءوندىرىس جۇكتەمەسىنىڭ تومەندىگىنەن شىعىنعا باتادى. وعان قوسا ۆاگونداردىڭ بوس تۇرۋى ءۇشىن ايىپپۇل تولەمەك. بۇل رەتتە مەملەكەت تە ەلەۋلى سالىق كىرىستەرىنەن قاعىلىپ وتىر.

ناتيجەسىندە، قازاقستاننىڭ استىق جانە ۇن ونىمدەرىنىڭ باسەكەگە قابىلەتتىلىگى تومەندەپ، ەكسپورتتىق پوزيسيالارى السىرەي تۇسۋدە.