ساتىبالدىنىڭ سابىرى سارقىلدى: الماتىداعى رەتسىز ارەكەتتەرگە كىنالىلەر اتالدى

ساعىنىش سارداروۆا 16 قاز. 2025 12:32

الماتى اكىمى دارحان ساتىبالدى الەۋمەتتىك نىسانداردىڭ قۇرىلىسىنا، جول ينفراقۇرىلىمى مەن قوعامدىق كەڭىستىكتەردى دامىتۋعا قاتىسىپ جۇرگەن مەردىگەر ۇيىمداردىڭ قۇرىلتايشىلارىمەن كەڭەس وتكىزدى، دەپ حابارلايدى Dalanews.kz.

كەزدەسۋ بارىسىندا قالا بويىنشا جۇزەگە اسىپ جاتقان جوبالاردىڭ ورىندالۋ بارىسىنا ارالىق قورىتىندى جاسالدى. بۇگىندە الماتىدا 147 جوبا ىسكە اسىرىلىپ جاتىر، سونىڭ ىشىندە 26 نىساندا مەرزىم ساقتالماعان، ساپاعا قاتىستى تالاپتار بۇزىلعان.

الماتىنىڭ قالا قۇرىلىسىن باقىلاۋ باسقارماسىنىڭ باسشىسى ولجاس تولەبايەۆتىڭ ايتۋىنشا، مونيتورينگ ناتيجەسىندە كەلىسىمشارت مەرزىمىن ۇنەمى بۇزىپ، قۇرىلىس نورمالارىن ساقتامايتىن توعىز مەردىگەر انىقتالعان. ولاردىڭ جۇمىسىندا جوبادان اۋىتقۋ، ۇيىمداستىرۋ دەڭگەيىنىڭ تومەندىگى جانە قۇجات جۇرگىزۋدەگى سالعىرتتىق ءجيى بايقالادى.

قالا اكىمى دارحان ساتىبالدى مۇنداي نەمقۇرايلىلىق قالا تۇرعىندارىنىڭ نارازىلىعىن تۋدىرىپ وتىرعانىن جەتكىزدى. كوپشىلىك مەكتەپ پەن بالاباقشا قۇرىلىسىنىڭ سوزبالاڭعا سالىنعانىنا، ساياباقتار مەن جاعالاۋلاردى اباتتاندىرۋ جۇمىستارىنىڭ كەشىگۋىنە، سونداي-اق جول مەن تروتۋارداعى قازىلعان جەرلەردىڭ ۋاقىتىندا قالپىنا كەلتىرىلمەۋىنە شاعىمدانعان.

"كەيبىر كومپانيالار ءبىر نىساندى بىتىرمەي جاتىپ، جاڭاسىن قولعا الاتىن كەلەڭسىز ادەت قالىپتاستىرعان. مۇنداي تاجىريبەگە مۇلدە جول بەرۋگە بولمايدى. ويتكەنى ماسەلە ادامداردىڭ قاۋىپسىزدىگى مەن جايلى ءومىرى تۋرالى بولىپ وتىر. ەگەر مەردىگەر مىندەتىن ءتيىستى دەڭگەيدە ورىنداماسا، ول قالا جوبالارىندا جۇمىس ىستەمەۋى كەرەك"، – دەدى دارحان ساتىبالدى.

كەڭەس قورىتىندىسى بويىنشا الماتى اكىمى قالا قۇرىلىسىن باقىلاۋ باسقارماسىنا مۇنداي نىساندى ءار اپتا سايىن قاداعالاپ وتىرۋدى، جاۋاپسىز مەردىگەرلەردىڭ ليسەنزياسىنان ايىرۋدى جانە قاجەت بولسا ماتەريالداردى قۇقىق قورعاۋ ورگاندارىنا جىبەرۋدى تاپسىردى.


ۇسىنىلعان
سوڭعى جاڭالىقتار