قىزىلوردا وبلىسىندا ۇيىمداسقان توپ مۇشەلەرىنە قاتىستى ۇكىم شىعارىلدى، دەپ حابارلايدى Dalanews.kz.

قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ۇيىمداسقان قىلمىستىق توپ قۇرامىنا كىرگەن 23 ايىپتالۋشىعا قاتىستى ۇكىم شىعارىلدى.

تەرگەۋ بارىسىندا بۇل توپتىڭ ەسىرتكى زاتتارىن اسا ءىرى كولەمدە زاڭسىز ءوسىرۋ جانە ساتۋمەن اينالىسقان تۇراقتى قىلمىستىق ۇيىم رەتىندە قۇرىلعانى انىقتالىپ، سوتتا دالەلدەندى.

سونىمەن قاتار، قىلمىستىق توپتى جاسىرىپ جۇرگەن لاۋازىمدى تۇلعانىڭ قاتىسى بار ەكەنى انىقتالدى، ال قالعان قاتىسۋشىلار ەسىرتكى زاتتارىن تاسىمالداۋعا، ساقتاۋعا جانە ولاردى وسىرۋگە جاعداي جاساۋعا كومەكتەسكەن.

قىلمىستىق ءىس بويىنشا فيگۋرانتتارعا قازاقستان رەسپۋبليكاسى قىلمىستىق كودەكسىنىڭ 190، 251، 262، 297، 300، 367، 407 جانە 434-باپتارى بويىنشا ايىپ تاعىلدى.

قىلمىستىق توپتىڭ بارلىق مۇشەلەرى تاعىلعان ايىپتار بويىنشا كىنالى دەپ تانىلدى. ولاردىڭ ىشىندە 2ء-ى ايىپتالۋشىعا ەڭ جوعارى جازا - 19 جىل باس بوستاندىعىنان ايىرۋ تاعايىندالدى. قالعان 18 ايىپتالۋشىعا 4 جىلدان 17 جىلعا دەيىنگى مەرزىمگە باس بوستاندىعىنان ايىرۋعا سوتتالدى، 2 ايىپتالۋشىعا بوستاندىعىن شەكتەۋ جازاسى تاعايىندالسا، 1 ايىپتالۋشىنىڭ ءىسى راقىمشىلىققا بايلانىستى توقتاتىلدى.

ۇكىم زاڭدى كۇشىنە ەنگەن جوق.