قاۋقارسىز وليگارح
بٸراق ويلاڭىزشى, رەسەيدە نارىقتىق ەكونوميكانىڭ زاڭدىلىعى بويىنشا جۇمىس ٸستەيتٸن ەكونوميكا بار ما? جوق. رەسەيدٸڭ ەكونوميكاسى اقشالى توپتاردى قالتاسىن قامپيتاتىن جٷيە دەپ اتاسا بولادى.
مەنٸڭشە, اقش-تىڭ مەملەكەتتٸك دەپارتامەنت قىزمەتكەرلەرٸ رەسەي ەكونوميكاسىن شىعىنعا باتىرىپ, ورمانداي ورىستى پۋتينگە قارسى قويامىز دەسە قاتتى قاتەلەسەدٸ.
وليگارحتار ارقىلى كرەملدٸ قىسىمعا الۋ "تەحنولوگيياسى" دا پۋتيندٸ رايىنان قايتارا قويماسى انىق. قايتا اقش باستاعان باتىس ەلدەرٸ رەسەيدٸڭ وليگارحييالىق ەكونوميكسىنا قىسىمدى كٷشەيتٸپ, پۋتيننٸڭ الدىنا بايشىكەشتەردٸ جىعىپ بەرگەندەرٸن ٶزدەرٸ دە بايقاماي وتىرعان سىڭايلى.
ەڭگٸمەنٸڭ اشىعىن ايتساق, بٷگٸندە رەسەيدە بيلٸككە قارسى تۇراتىنداي تابانىنىڭ بٷرٸ بار وليگارحتار دا قالعان جوق. مۇنى رەسەيدٸڭ ارداگەر جۋرناليستٸ ۆلاديمير پوزنەردٸڭ ٶز بٸرنەشە رەت ايتقانى ەسٸمٸزدە.
قازٸر ميللياردتاعان دوللاردى قالتاعا باسقان وليگارحتار اقشا مەن جاقسى ٶمٸر سٷرەتٸن مٷمكٸندٸكە يە. بٸراق ولاردىڭ كرەملگە قارسى ساياسي امبيتسيياسىن كٶرسەتەتٸندەي قاۋقارى قالعان جوق.
سوندىقتان اقش پەن باتىس ەلدەرٸنٸڭ رەسەيگە بٸرقانشا اۋىر سانكتسييالار سالىپ, وليگارحتار ارقىلى پۋتيندٸ تاقتان تايدىرامىز دەگەنٸ ٸسكە اسۋى ٶتە قيىن شارۋا.
اقش پەن باتىستا ەكونوميكاعا, قارجىعا, دٷنيە-مٷلٸككە قاتىستى عاسىرلار بويى قالىپتاسقان كٶزقاراس بار. ايتالىق, اقش-تاعى اۋقاتتى جاندارى (ولاردى وليگارح دەپ ايتۋعا اۋزىڭ بارمايدى) ميللياردتاعان دوللارعا باعالاناتىن دەۋلەتٸنە تاباندى ەڭبەكتٸڭ ارقاسىندا قول جەتكٸزگەنٸ بەلگٸلٸ.
ال وسىنداي مەحنات تٸرلٸكپەن تاپقان دەۋلەتٸنە قاندايدا بٸر توپتار كٷش سالسا, ولار جان اياماي كٷرەسكە شىعاتىنى بەلگٸلٸ.
ال رەسەيدٸڭ (پوستكەڭەستٸك ەلدەر دەپ قابىلداساڭىز دا بولادى) وليگارحتارى كوممۋنيستٸك قوعامنان قالعان قىرۋار دٷنيە-مٷلٸكتٸڭ بٸر-اق كٷندە قوجاسى بولىپ شىعا كەلگەنٸن جۇرتتىڭ بەرٸ بٸلەدٸ.
وسىنداي وڭاي جولمەن از كٷندە بايىعان جاندار كومپانييالارىنىڭ مٷددەسٸ ٷشٸن جان اياماي كٷرەسەدٸ دەگەنگە كٸم سەنەدٸ. وليگارحتار بيلٸك قالاسا, زاماتتا سول مال-مٷلٸكتٸڭ تەڭ جارتىسىنان ايىرالاتىنىن جاقسى بٸلەدٸ. پۋتين ولاردى وسىنداي قۇرباندىققا بارۋعا دايار بولۋعا جىلدار بويى دايىنداعانىن دا ۇمىتپاۋىمىز كەرەك.
سول سەبەپتٸ كٷن سايىن وسىنداي كٷمەن-كٷدٸكپەن عۇمىر كەشەتٸن رەسەيدٸڭ وليگارحتارى بيلٸككە قارسى باتىل ەرەكەتكە بارىپ, پۋتيندٸ تاعىنان تٶڭكەرٸپ تاستاي المايدى. بويىنداعى ٷرەيٸن جەڭە الماعان وليگارحتار ورىس حالقىن ۇشپاققا شىعارادى دەگەنگە كٸم سەنەدٸ. جالپى بۇل پوستكەڭەستٸك ەلدەرگە تەن قاسيەت.
جەلٸككەن جۇرت
اقش پەن باتىس ەلدەرٸنٸڭ رەسەيگە قارسى سانكتسييالارى وليگارحتارعا, جەكەلەگەن كومپانييالارعا, تٸپتٸ رەسەيدٸڭ ەكونوميكاسىنا قاتتى ەسەر ەتەتٸنٸ انىق. بٸراق وسى سانكتسييالاردان جاپا شەككەن وليگارحتار مەن قاراپايىم حالىق كرەملدٸڭ قازٸرگٸ قوجايىنى پۋتينگە قارسى شىقپايدى. بٸز بٸلەتٸن ورىس حالقى تاعدىردىڭ تاۋقىمەتٸن كٶرگەن سايىن ٶمٸرگە الاكٶزدەنٸپ, اينالاسىنان جاۋ ٸزدەيتٸن رومانتيك حالىق ەمەسپە? مۇنى بٸز تاريحي وقيعالاردان جاقسى بٸلەمٸز.
العاشىندا رەسەيدٸڭ سىرتقى ۆەدموستۆاسى بۇل اقپاراتتى جوققا شىعارىپ, مەرت بولعانداردىڭ اراسىندا رەسەيدٸڭ ەسكەريلەرٸ جوق ەكەنٸن ايتتى. بٸراق كەيٸننەن اپتا اينالماي جاتىپ, بار شىندىقتىڭ بەتٸ اشىلىپ, مايدان دالاسىندا مەرت بولعانداردىڭ "ۆاگنەردٸڭ" ساربازدارى ەكەنٸ بەلگٸلٸ بولدى.
ەڭ قىزعى, سول كەزدە كٷنكٶرٸستٸڭ قامىمەن سيريياداعى سوعىسقا اقشا ٷشٸن اتتانعان قاراپايىم ورىستىڭ وفيتسەرلەرٸنٸڭ سوڭىندا اڭىراپ قالعان جەسٸرلەرٸ ٶزدەرٸن وسىنداي كٷيگە تٷسٸرگەن پۋتيندٸ ايىپتاۋدىڭ ورنىنا "بٸزدٸڭ ەر ازاماتتارىمىزدىڭ ٶلٸمٸ بەكەر بولماسىن, ٶش الىڭدار" دەپ اقىلعا سيمايتىن ەڭگٸمە ايتقانىنا كۋە بولدىق.
نۇرلان جۇماحان, جۋرناليست
