2025 جىلدىڭ 12 ساۋىرىندە الماتى تەحنولوگيا جانە فلوريستيكا كوللەدجىندە «سالت - ءداستۇرىم – تاۋسىلمايتىن بايلىعىم» اتتى ءىس-شارا دۇركىرەپ ءوتتى.

كوكتەمنىڭ جىلى لەبىمەن قاتار كەلەتىن ۇلىستىڭ ۇلى كۇنى ناۋرىز مەيرامىنان ايعا جۋىق ۋاقىت وتسە دە مەرەكەلىك كوڭىل-كۇي ءالى دە شۋاقتى كۇندەردەن ەسىپ تۇر. الماتى تەحنولوگيا جانە فلوريستيكا كوللەدجىندە وتكەن مەرەكەلىك ءىس-شارا سونىڭ ايقىن دالەلى. ناۋرىز مەيرامىن اۋقىمدى تويلاۋ ارقىلى ۇلتتىق ءداستۇردى جاڭعىرتىپ، جاس ۇرپاققا قازاق حالقىنىڭ باي مادەني مۇراسىن تانىتۋدى ماقسات ەتىپ وتىر.

ناۋرىزدىڭ ءمانىن تەرەڭىرەك تۇسىنۋگە، ۇلتتىق داستۇرلەردى جاڭعىرتۋعا جانە دە ۇلتتىق ويىنداردىڭ ماڭىزىن ارتتىرۋ ءۇشىن اسىق اتۋ، ارقان تارتۋ، قازاق كۇرەسى سياقتى ويىندار ويناتىلىپ جاتسا، كيەلى ساحنادا تۇساۋكەسەر ءداستۇرى كورسەتىلدى. تۇساۋكەسەردى «ونەرلى انالار» توبىنداعى اق كيمەشەك كيگەن اپالارمىز،  م.اۋەزوۆ اتىنداعى قازاق ۇلتتىق دراما تەاترىنىڭ ءارتىسى شىنار حانىم مەن كوللەدج ديرەكتورى نۋرىمبەتوۆ اناربەك قالدار ۇلى ءراسىمدى جاسادى.

كەيبىر داستۇرلەردىڭ ۇمىتىلۋى نەمەسە وزگەرۋى قازىرگى زاماننىڭ تالاپتارىنا ساي بولىپ وتىر. دەگەنمەن، وسى داستۇرلەردى جاڭعىرتۋ جانە قايتا جانداندىرۋ ارقىلى ۇلتتىق قۇندىلىقتاردى ساقتاۋ، جاستار اراسىندا ۇلتتىق سانانى قالىپتاستىرۋ مۇمكىندىگى بار. ۇمىتىلعان داستۇرلەردى زەرتتەپ، ولاردىڭ تاربيەلىك جانە مادەني ءمانىن ءتۇسىندىرۋ ءۇشىن مەرەكە اياسىندا ۇلتتىق قولونەر كورمەسى ارنايى ۇيىمداستىرىلعان. قازاق حالقىنىڭ باي مۇراسىمەن تانىسىپ، كيىز ءۇي ىشىندەگى تۇرمىستىق بۇيىمداردى، زەرگەرلىك ونەر تۋىندىلارىن، سونداي-اق ءداستۇرلى كيىم ۇلگىلەرىن تاماشالاۋعا بولادى.

ودان بولەك، «ءار ءىستىڭ ۇستاسى بار، ءار ۇستانىڭ ۇستازى بار» دەگەندەي  ەل ىشىندە ءار ءىستىڭ ءوز شەبەرى بارى انىق. «بالام ونەرلى بولسىن دەسەڭ، ونەگەڭدى كورسەت» -دەگەن ناقىل ءسوزدى ۇستانعان، ءوزىنىڭ  ىسمەرلىگىمەن، شەبەرلىگىمەن كوكىرەك كوزىمىزدى وياتقان، قولونەردىڭ ءارى مەن ءنارىن قانىمىزعا سىڭىرگەن التىن قولدى انالارىمىز ۇرشىق ءيىرۋ، ءجۇن ساباۋ، سىرماق سىرۋ، كەستە تىگۋ سياقتى ونەرلەرىن كورسەتىپ، ءتىلىمىز، ءدىلىمىز، ءدىنىمىز، ادەت-عۇرىپ، ءسالت-داستۇرىمىز، قولونەرىمىز قازاق دۇنيەتانىمىندا اجىراماس ۇعىمدار ەكەنىن كورسەتىپ جاتتى.

قازاقتىڭ قاسيەتتى قولونەرى - كونە تاريحپەن بىرگە ءوسىپ، بىتە قايناسقان باي قازىنا. ۇلتتىق ءداستۇرىمىز بەن ۇلتتىق قولونەر بۇيىمدارىنىڭ، ادەت-عۇرىپتاردىڭ بۇگىنگى قوعامدا ءومىر ءسۇرىپ، قايتا جاڭعىرۋى ماڭىزدى. اتا-بابامىزدان جەتكەن رۋحاني قۇندىلىقتارىمىزدى، ونىڭ ىشىندە اعاشتان جاسالعان بۇيىمداردىڭ ەڭ كوپ تاراعان ءتۇرى – كەلى مەن كەلساپ، كۇبى جانە قول ديىرمەنمەن تانىستىرىپ، كورسەتىپ جاتسا، ەندى ءبىرى  قامشى ءورۋ ونەرى سىي-سىياپاتتىڭ تورەسى، ەر جىگىتتىڭ سەرىگى، ايبىنى، شاڭىراقتىڭ كيەسى، ءتىپتى، كەيدە باتىردىڭ قارۋى دا بولعاندىعىن دارىپتەپ، ۇيرەتىپ جاتىر.

ناۋرىز مەيرامىمەن قاتار قازاقستان حالقى اسسامبلەياسىنىڭ قۇرىلعانىنا 30 جىل تولۋىدا اتالىپ ءوتىلدى. بىرلىك، تاتۋلىق جانە ىنتىماق – ەلدىگىمىزدىڭ مىزعىماس تۇعىرى ءھام مەملەكەتىمىزدىڭ باستى قۇندىلىعى. ۇلتارالىق تاتۋلىقتى نىعايتۋدا قازاقستاندا تۇرىپ جاتقان 130-دان اسا ۇلت پەن ۇلىس وكىلدەرى تاتۋلىقتا ءومىر ءسۇرىپ جاتىر دەسەك، سونىڭ ىشىندە اتالعان كوللەدجدە 19 ۇلت وكىلدەرىنىڭ ءبىلىم الىپ جاتقانى دا سونىڭ دالەلى ىسپەتتى.

         اتالعان، ءىس - شارا بارىسىندا ستۋدەنتتەر ءار ۇلتتىڭ ۇلتتىق كيىمىن كيىپ، سول ۇلتتىڭ ونەرىن كورسەتتى. سونىمەن قاتار، «ونەرلى انالار» توبىن باستاعان بوتان اپامىز «قازاق وسى» انىمەن، ودان بولەك، مەرەكەلىك كوڭىل - كۇي سىيلاۋ ءۇشىن ساحنا تورىنە الىستان قوناق بولىپ،  جىلى لەبىزدەرى مەن ونەرلەرىن الا كەلگەن  ۇيعىر مەن ءازىربايجان ۇلتتارىنىڭ وكىلدەرى، مارۋپوۆ ۆامۋق «جانانيم» ءانىن ارناسا، «اسسامبلەيا جاستارى» نيزاموۆا تولۋناي ازاتوۆنا مەرەكەمەن قۇتتىقتادى.

  الماتى تەحنولوگيا جانە فلوريستيكا كوللەدجىنىڭ ونەرلى ستۋدەنتتەرى اسەم اننەن شاشۋ شاشىپ، مىڭ بۇرالا بيلەسە،  كورشىلەس «ءسان جانە مودا ديزاين» كوللەدجىنەن ارنايى ستۋدەنتتەر كەلىپ، كۇمبىرلەگەن كۇيمەن، كەشتىڭ ءسانىن كىرگىزدى. مەرەكەگە كەلگەن قوناقتار مەن اتا-انالارعا، ستۋدەنتتەرگە تەگىن كوجە تاراتىلىپ، باۋىرساق ۇلەستىرىلدى.

وسىلايشا، الماتى تەحنولوگيا جانە فلوريستيكا كوللەدجىندە بىرنەشە ءىس-شارانىڭ باسىن بىرىكتىرگەن «سالت - ءداستۇرىم – تاۋسىلمايتىن بايلىعىم»  دەپ، سالت داستۇرلەردى دارىپتەۋ ماقساتىندا ادەمى كەش اتالىپ ءوتتى.

باقىت سىدىقوۆا