رەسەي ٶزبەكستاننىڭ جىزاق وبلىسىندا اتوم ەلەكتر ستانتسيياسىن سالادى. دەگەنمەن كەيبٸر ساراپشىلار بۇل جوبا كٷمەندٸ ەكەنٸن ايتادى. سولاردىڭ بٸرٸ - ٶزبەك ەكونوميسٸ بەحزود حوشيموۆ. ول "روساتومنىڭ" ٶزبەكستانعا كەلۋٸنٸڭ ەكونوميكالىق جەنە ساياسي استارى بارىن ايتتى, - دەپ حابارلايدى Dalanews.kz.
رەسەي پرەزيدەنتٸ ۆلاديمير پۋتيننٸڭ تاشكەنتكە ساپارى اياسىندا تيٸستٸ كەلٸسٸمگە قول قويىلعان. وسىلايشا جازدا جىزاق وبلىسىندا قۋاتى 330 مۆت بولاتىن نىساننىڭ قۇرىلىسى باستالماق. قۇرىلىس جۇمىستارى "روساتوم"-نىڭ جەتەكشٸلٸگٸمەن جٷزەگە اسادى.
ساراپشى "اتوم ەلەكتر ستانتسيياسىن سالۋ تۋرالى شەشٸم ەكونوميكالىق تۇرعىدان ورىندى بولدى ما, ونىڭ قۇرىلىسىنا ٶزبەكستان قانشا قارجى جۇمسايدى?" دەگەن ساۋالداردى قويدى.
"ول (اەس - ەسك.) باسقا قارجى كٶزدەرٸنەن, سونىڭ ٸشٸندە مەملەكەتتٸك قارىزدان قارجىلاندىرىلا ما? ەڭ باستىسى, مەملەكەت سالىپ جاتسا, بۇدان ٶزبەكستان حالقىنا قانشا شىعىن كەلەدٸ? مەملەكەتتٸك جەنە مەملەكەتتٸك ەمەس قارجى كٶزٸنەن پايدالانىلاتىن سومالار تولىق كٶرسەتٸلۋگە تيٸس. بۇل تالاپ بٸزدٸڭ كونستيتۋتسييامىزدا دا ايقىندالعان. ...بٸراق كەلٸسٸمدە ستانتسييانىڭ باعاسىنان دا ماڭىزدىراق باسقا دا شارتتار بار. ول تۋرالى دا ايتۋىمىز كەرەك. ستانتسييانى كٸم باسقاراتىنى, ەلەكتر ەنەرگيياسى قانداي باعامەن ساتىلاتىنى ٶتە ماڭىزدى. تٷركييادا رەسەي (اەس-تٸ) تولىعىمەن ٶز قاراجاتىنا سالىپ, 1 كيلوۆاتت ساعات ەنەرگيياعا 12,5 تسەنت دەگەن مەمٸلە جاسادى. دەل وسىنداي جاعدايدا قابىلداۋ كەرەك پە دەگەن ورىندى سۇراق تۋىندايدى. بٷگٸندە ٶزبەكستاندا ارزانىراق گەنەراتسييا كٶزدەرٸ بولسا, قىمبات اتوم ەنەرگيياسى قانشالىق قاجەت?" - دەدٸ ول.
حوشيموۆ مەسەلەنٸڭ ساياسي اسپەكتٸلەرٸ بارىن مەلٸمدەدٸ.
"مەملەكەتتٸڭ شىعىنىنا, ەسٸرەسە, ٸرٸ جەنە ماڭىزدىلارىنا قاتىستى ەكٸنشٸ مەسەلە - مەردٸگەردٸ تاڭداۋ. تەندەرگە "روساتومنان" باسقا كومپانييالار قاتىستى ما? فرانتسييا مەن جاپونييا سيياقتى ەلدەردە اتوم ەنەرگەتيكاسى ەلدەقايدا دامىعان, سونىمەن قاتار, ولار جوعارى ساپالى ستانتسييالار سالىپ جاتىر. ولاردىڭ كومپانييالارى بٸزدٸڭ ٷكٸمەتكە نە ۇسىندى? نەلٸكتەن "روساتوم"? بۇل سۇراقتى قويىپ وتىرعان سەبەبٸم, مۇنداي مەسەلەدە ساياساتقا ورىن جوق. ەۋروپا رەسەيلٸك ەنەرگەتيكادان تولىعىمەن باس تارتتى, بۇعان ەۋروپاداعى سوعىس سەبەپ بولدى. بٸر كەزدەرٸ گەرمانييا ساياسي اسپەكتٸنٸ ەسكەرمەي, تەك ەكونوميكالىق ەسەپكە سٷيەنٸپ, رەسەيلٸك ەنەرگييا ارزان دەپ شەشتٸ جەنە بۇل شەشٸمنەن كٶپ شىعىنعا ۇشىرادى. بٸراق بٸز سيياقتى ەلدەقايدا شاعىن مەملەكەتكە اەس-تٸڭ نەگٸزگٸ مەردٸگەرٸ رەسەي مەملەكەتٸ جەنە رەسەي مەملەكەتتٸك كەسٸپورنى ەكەنٸ ٶتە ٷلكەن مەسەلە بولۋى كەرەك", - دەدٸ ول.
ول "جاپوندار مەن ورىستار بٸردەي باعا ۇسىنسا, جاپونداردى تاڭداۋ كەرەك دەر ەدٸم. قالاي بولعاندا دا, ساياسي قاۋٸپ ەلدەقايدا تٶمەن. سوعىس ەلٸ بٸتكەن جوق, ەگەر جاڭا سانكتسييالار سالىنسا, مەسەلەن بٸزدٸڭ ەلٸمٸزدەگٸ ەلەكتر ستانتسيياسى مەن ونىڭ تۇتىنۋشىلارىنا سالىنسا, ٶزبەكتەرگە كەلەر سالدارى اشىق مەسەلە بولادى. ٶزبەكستان ەنەرگەتيكا سالاسىن جاڭعىرتۋعا الاتىن قارجى نەگٸزٸنەن باتىس نەمەسە باتىس جەتەكشٸلٸك ەتەتٸن قارجى ينستيتۋتتارىنان كەلەدٸ. بۇل ۇيىمداردىڭ بارلىعى رەسەيگە قارسى سانكتسييا سالعان. ەندٸ بٸر عانا اەس-تٸڭ كەسٸرٸنەن بٷكٸل ەنەرگەتيكالىق جٷيەنٸ جاڭعىرتاتىن تەحنولوگييا مەن قارجى كٶزٸ جويىلىپ كەتەتٸن قاۋٸپ بار ما?" - دەدٸ.
