بۇگىن تۇندە ەلوردا تۇرعىندارىن الاڭداتقان توتەنشە جاعداي ورىن الدى. ساعات تۇنگى 4 شاماسىندا استانانىڭ سول جاعالاۋىنداعى كوپقاباتتى تۇرعىن ءۇيدىڭ ءبىرىنشى قاباتىندا ورنالاسقان "Karima" ءدامحاناسىندا ءورت شىقتى، دەپ حابارلايدى Dalanews.kz.
وقيعا ورنى- دوستىق پەن اقمەشىت كوشەلەرىنىڭ قيىلىسىنداعى سەگىز قاباتتى تۇرعىن ءۇي. كۋاگەرلەردىڭ ايتۋىنشا، الدىمەن قاتتى تارسىل ەستىلىپ، ارتىنشا قويۋ ءتۇتىن مەن جالىن ءدامحانادان كوككە كوتەرىلگەن. ءورت اپ-ساتتە كەڭ اۋماقتى شارپىپ، بۇكىل ۇيگە ءقاۋىپ توندىرگەن.
وقيعا ورنىنا جەدەل جەتكەن ءورت سوندىرۋشىلەر قىزىل جالىنمەن كۇرەستى دەرەۋ باستاپ، ءۇي تۇرعىندارىن ءقاۋىپسىز جەرگە ەۆاكۋاسيالادى. ابىروي بولعاندا، ادام شىعىنى جوق.
قازىرگى تاڭدا، ءورتتىڭ شىعۋ سەبەپتەرى انىقتالۋدا جانە دە ارنايى ەسپەرتيزا جۇمىستارى جۇرگىزىلۋدە. قالالىق اكىمدىك پەن جاۋاپتى ورگاندار وقيعا سالدارىن جويۋ جۇمىستارىن جۇرگىزىپ جاتىر.
وقيعا كەزىندە زارداپ شەككەن تۇرعىنداردىڭ ءبىرى Dalanews.kz تىلشىسىنە سول تۇنگى ساتتەردى ەسكە الىپ، ءوز اسەرىمەن ءبولىستى.
"ءبارى اياق استىنان بولدى. ءتۇن ورتاسىندا سىرتتان تارسىل ەستىلدى. تەرەزەدەن قاراسام، تومەننەن قويۋ ءتۇتىن شىعىپ جاتىر ەكەن. بالالارىم شوشىپ وياندى. قاتتى قورقىپ قالدىق. ايتەۋىر، قۇتقارۋشىلار دەر كەزىندە كەلىپ، ءبىزدى سىرتقا الىپ شىقتى"،- دەيدى ول.
قازىرگى ۋاقىتتا ءورتتىڭ ناقتى شىعۋ سەبەبى انىقتالىپ جاتىر. بۇل باعىتتا ماماندار تەحنيكالىق ساراپتاما جۇرگىزىپ جاتىر. قالالىق توتەنشە جاعدايلار دەپارتامەنتى بۇل وقيعا بويىنشا تەرگەۋ باستالعانىن مالىمدەدى.
قازاقستان رەسپۋبليكاسى توتەنشە جاعدايلار مينيسترلىگى ازاماتتارعا ءورت كەزىندە دۇرىس ارەكەت ەتۋ جولدارىن الدىن الا ءبىلىپ ءجۇرۋدى ۇسىنادى. سەبەبى، ءدال ءسىزدىڭ بايسالدى جانە جىلدام شەشىمىڭىز ءوز ءومىرىڭىزدى عانا ەمەس، وزگەلەردى دە امان الىپ قالۋى مۇمكىن.
ءورت كەزىندە قالاي ارەكەت ەتۋ كەرەك؟
ءورت- بۇل ءاردايىم كۇتپەگەن ءارى ءقاۋىپتى جاعداي. مۇنداي ساتتە ادام ۇرەيگە بوي الدىرىپ، نە ىستەۋ كەرەگىن ۇمىتىپ قالۋى مۇمكىن. ءتىپتى بالا كەزدەن جادىمىزدا ساقتالىپ قالعان- «112 نومىرىنە قوڭىراۋ شالىڭىز» دەگەن قاراپايىم كەڭەستىڭ ءوزى سول ساتتە ەسىمىزدەن شىعىپ كەتۋى ىقتيمال.
تومەندە ءورت شىققان جاعدايدا ەستە ۇستاۋعا ءتيىس قاراپايىم، ءبىراق وتە ماڭىزدى كەڭەستەر ۇسىنىلادى.
- ءورتتىڭ العاشقى بەلگىلەرىن بايقاساڭىز نەمەسە ءتۇتىننىڭ ءيىسىن سەزسەڭىز:
بىردەن 112 نومىرىنە حابارلاسىڭىز؛
- ەلەكتر قۋاتىن ءسوندىرىپ، گازدى ءوشىرىڭىز.
- الدىمەن بالالار مەن قارت ادامداردىڭ قاۋىپسىزدىگىن قامتاماسىز ەتىڭىز.
ولاردى ءورت وشاعىنان الىسقا شىعارىڭىز؛
ويتكەنى گاز باللوندارى جارىلۋى نەمەسە وت تەز تارالۋى مۇمكىن.
- تەرەزەلەردى اشپاڭىز.
اشىلعان تەرەزەدەن كەلەتىن وتتەگى وتتىڭ كۇشەيۋىنە سەبەپ بولادى.
- جالىن ءبىر بولمەدە بولسا- ەسىكتى مىقتاپ جابىڭىز.
بۇل وتتىڭ باسقا بولمەلەرگە تارالۋىن تەجەيدى؛
ەسىكتىڭ ساڭىلاۋىن دىمقىل شۇبەرەكپەن بەكىتىڭىز- ءتۇتىن كىرمەيدى.
- ءتۇتىن باسقان بولمەدە ەڭكەيىپ نەمەسە ەڭبەكتەپ قوزعالىڭىز.
ويتكەنى ءتۇتىن مەن ىستىق اۋا جوعارى كوتەرىلەدى؛
تىنىس جولدارىن ماتامەن، مۇمكىندىگىنشە دىمقىل شۇبەرەكپەن جابىڭىز.
- ەگەر جالىننىڭ ىشىنەن ءوتۋ قاجەت بولسا:
سۋعا ءتۇسىپ الىڭىز نەمەسە ۇستىڭىزگە دىمقىل كورپە جابىڭىز؛
دەمىڭىزدى ىشكە تارتىپ، جىلدام جۇگىرىپ ءوتىڭىز.
- ەگەر سىرتقا ءوز بەتىڭشە شىعا الماساڭىز:
بالكونعا نەمەسە تەرەزە الدىنا شىعىڭىز- بۇل جەرلەردەن قۇتقارۋشىلار ءسىزدى تەز تابادى؛
اق ماتا، كورپە نەمەسە كوزگە تۇسەتىن باسقا دا زات ءىلىپ، ءوزىڭىزدىڭ قايدا ەكەنىڭىزدى ءبىلدىرىڭىز.
ەڭ باستىسى – سابىر ساقتاڭىز!
پانيكا- باستى جاۋ. ءورت كەزىندە ءار سەكۋند ماڭىزدى. قاراپايىم ەرەجەلەردى ەستە ساقتاپ، ولاردى الدىن الا جاقىندارىڭىزعا ۇيرەتىڭىز.
