2016 جىلى استانا اكىمدىگى «تۇلپار» ات سپورتى كەشەنىن اۋكسيون ارقىلى نەبارى 200 مىڭ تەڭگەگە ساتىپ جىبەرگەن. كەيىن قالا بيلىگى جاڭا «ارعىماق» ات سپورتى كەشەنىن بيۋدجەتتەن 7 ملرد تەڭگەگە قايتا ساتىپ الۋعا شەشىم قابىلداعان. بۇل تۋرالى قالالىق ءماسليحات دەپۋتاتى ۆلاديسلاۆ سەرگەيەۆ مالىمدەدى، دەپ حابارلايدى Dalanews.kz.

«2016 جىلى «تۇلپار» ات سپورتى كەشەنى اۋكسيون ارقىلى وتە كۇلكىلى باعاعا – شامامەن 200 مىڭ تەڭگەگە ساتىلدى. بۇدان كەيىن وتكەن شاقىرىلىمدا بىزگە «ارعىماق» اتتى جاڭا كەشەندى 7 ملرد تەڭگەگە ساتىپ الۋ قاجەتتىگى ماسەلەسى كەلىپ ءتۇستى. دەپۋتاتتاردىڭ ءبىر بولىگى، سونىڭ ىشىندە ءوزىم دە، بۇعان قارسى بولدىق. ءبىراق كوپشىلىك داۋىسپەن ساتىپ الۋ تۋرالى شەشىم قابىلدانىپ، ول ورىندالدى»، – دەدى سەرگەيەۆ.

ونىڭ ايتۋىنشا، ءقازىر بۇل كەشەندى جەكە كومپانياعا سەنىمگەرلىك باسقارۋعا بەرۋ ماسەلەسى قاراستىرىلىپ جاتىر.

«وكىنىشكە قاراي، ءبىز بيۋدجەت قارجىسىنا سالىنعان نىسانداردى كەيىن جەكەمەنشىك كومپانيالارعا تاپسىرامىز. ال ولار باسسەينگە بارىپ جۇرگەن نەمەسە يپپوتەراپيامەن اينالىساتىن بالالارىمىزدىڭ ەسەبىنەن پايدا تابادى»، – دەدى دەپۋتات.

سەرگەيەۆ اكىمدىكتەن بۇل شەشىمدى قايتا قاراپ، تالداۋ جۇرگىزۋدى سۇرادى. ول باستاپقىدا كەشەن بالالاردىڭ تەگىن يپپوتەراپيامەن اينالىسۋى ءۇشىن ساتىپ الىنعانىن دا ەسكە سالدى.

اكىمدىكتىڭ جاۋابى

قالالىق دەنە شىنىقتىرۋ جانە سپورت باسقارماسىنىڭ باسشىسى ۆاسيليي ليەۆيتتىڭ ايتۋىنشا، بۇل ماسەلە ازىرگە كەلىسسوزدەر دەڭگەيىندە تۇر.