كۇرشىم اۋىلىنداعى ورتالىق ساياباق كەشەندى جوندەۋ جۇمىستارىنان كەيىن قايتا اشىلدى. حالىقارالىق بالالاردى قورعاۋ كۇنىمەن تۇسپا-تۇس كەلگەن بۇل شارا بۇلدىرشىندەرگە باعالى تارتۋ بولعانداي.
جاڭا ساياباقتىڭ ىشىندە ويىن الاڭقايى، فۋتبول جانە باسكەتبول الاڭدارى، ءتىپتى شاحمات ۇستەلدەرى دە بار.
شىعىس وڭىرىنە جۇمىس ساپارىمەن كەلگەن پارلامەنت ءماجىلىسىنىڭ دەپۋتاتتارى رينات زايتوۆپەن ماقسات تولىقباي كۇرشىمدىكتەردىڭ قۋانىشىنا كۋا بولىپ، مەرەكەسىن جاڭا ساياباقتا اتاپ ءوتىپ جاتقان بۇلدىرشىندەرگە جىلى لەبىز ارنادى.
– بالالاردىڭ كۇلكىسى ۇزىلمەسىن. ولاردىڭ ءاربىر كۇنى بۇگىنگىدەي شۋاقتى بولسا ەكەن دەيمىز. ەل ەرتەڭى جارقىن بولسىن! – دەدى ءماجىلىس دەپۋتاتى رينات زايتوۆ.
ايتا كەتەيىك، ساياباقتى جوندەۋ جۇمىستارى وتكەن جىلدىڭ سوڭىندا اياقتالعان. ءتيىستى قۇجاتتاما رەتتەلگەننەن كەيىن ساياباق پايدالانۋعا بەرىلدى.
كوكتەمدە ب ا ق ىشىنە تال ەگىلدى. جوندەۋ جۇمىستارى اياسىندا گۇلزارلار دايىندالعان بولاتىن، بۇگىنگە دەيىن كوگالداندىرۋ جۇمىستارى تولىق جۇرگىزىلدى.
ساياباق ىشىندەگى جولدار جوندەلىپ، جارىق تارتىلعان. قورشاۋ دا جاڭارتىلدى. بالالار مەن جاسوسپىرىمدەرگە قاجەتتى جابدىقتار تۇتاس بار ەكەنىن ايتتىق. سونىمەن قاتار ساياباق ىشىندە بۇقارالىق ءىش-شارالاردى وتكىزۋگە ارنالعان ارنايى ورىن بار. بالالار مەرەكەسى بۇگىن سول جەردە اتاپ ءوتىلدى.
سالتاناتتى تۇردە قىزىل لەنتانى قيعان مادەنيەت سالاسىنىڭ ارداگەرى شاكەرحان تويبايەۆ بالالاردى جانە جەرگىلىكتى حالىقتى قۇتتىقتاي كەلە اتقارىلعان جۇمىسقا جوعارى باعا بەردى.
– بالالاردىڭ ۋاقىتىن ءتيىمدى وتكىزۋىنە، جاستاردىڭ سپورتپەن شۇعىلدانىپ شىڭدالۋىنا، ۇلكەندەردىڭ سەرۋەندەپ سەيىل قۇرۋىنا دا ىڭعايلى ورىن بولدى. بۇل ەندى اۋىلدىقتاردىڭ سۇيىكتى دەمالىس ورنىنا اينالادى، – دەدى اۋىل اقساقالى.
